ކޮވިޑާ ގުޅިގެން ހެލްތް ޕްރޮޓެކްޝަން އޭޖެންސީ (އެޗްޕީއޭ) އާއި ޓޫރިޒަމް މިނިސްޓްރީން ކަނޑައަޅާފައިވާ ގައިޑްލައިންތަކަށް ޓޫރިސްޓް ފެސިލިޓީތަކުން އަމަލު ކުރަމުންދޭތޯ ބެލުމަށް މިސްޓްރީ ގެސްޓް ތައާރަފްކުރަން ނިންމައިފިއެވެ.
ޓޫރިޒަމް މިނިސްޓްރީން ބުނީ، ކޮވިޑާ ގުޅިގެން ކަނޑައަޅާފައިވާ ގައިޑް ލައިންތަކަށް ޓޫރިސްޓް ފެސިލިޓީތަކުން އަމަލު ކުރަމުންދޭތޯ ބެލުމަށް ފަށާ ޕްރޮގްރާމުގައި 'މިސްޓްރީ ގެސްޓުން' ތައާރަފް ކުރުމަށް ނިންމާފައިވާ ކަމަށެވެ. މި ޕްރޮގްރާމްގައި އެ 'މިސްޓްރީ ގެސްޓުން' ޓޫރިސްޓް ފެސިލިޓީތަކަށް ގޮސް ކުރާ ތަޖުރިބާއަށް ބިނާކޮށް އެ ޓޫރިސްޓް ފެސިލިޓީއެއްގައި ގާއިމްކޮށްފައިވާ ޕްރޮސީޖާ އާއި ގައިޑްލައިނަށް އަމަލު ކުރަމުންދާ މިންވަރާ ފެންވަރު މިނިސްޓްރީއަށް ރިޕޯޓް ކުރާނެ ކަމަށް ޓޫރިޒަމުން ބުނެއެވެ.
އެގޮތުން މިސްޓްރީ ގެސްޓުން ޓޫރިސްޓް ފެސިލިޓީތަކަށް ބުކިން ހަދާނީ ޓޫރިޒަމް މިނިސްޓްރީ މެދުވެރިނުވެ އަމިއްލައަށް ކަމަށް ޓޫރިޒަމުން ބުނެއެވެ. މީގެ އިތުރުން މި ޕްރޮގްރާމަކީ ރައްޔިތުންނާ ޓޫރިސްޓް ފެސިލިޓީތަކުގެ މުވައްޒަފުން އަދި ރާއްޖެއަށް ޒިޔާރަތްކުރާ ފަތުރުވެރިންގެ ސަލާމަތާ ރައްކާތެރިކަން ކަށަވަރުކުރުމަށް ބާރުއެޅުމަށް ކުރިއަށް ގެންދާ ޕްރޮގްރާމެއް ކަމަށް ޓޫރިޒަމުން ބުނެއެވެ.
ކޮވިޑާ ގުޅިގެން ބޯޑަރުތައް ބަންދުކޮށްފައި އޮތުމަށް ފަހު މިދިޔަ ޖުލައި މަހުގެ 15 ވަނަ ދުވަހު ބޯޑަރުތައް ހުޅުވާލުމާއެކު ރާއްޖެއަށް ގިނަ އަދަދެއްގެ ފަތުރުވެރިން އަންނަނީ ޒިޔާރަތް ކުރަމުންނެވެ. އެގޮތުން މި މަހުގެ ފަސް ވަނަ ދުވަހުގެ ނިޔަލަށް ރާއްޖެ އަށް 427,212 ޓޫރިސްޓުން ޒިޔާރަތް ކޮށްފައިވާއިރު، މި މުއްދަތުގައި ރާއްޖެ އަށް އެންމެ ގިނައިން މީހުން ޒިޔާރަތް ކޮށްފައި ވަނީ ރަޝިއާއިންނެވެ. އެ ގައުމުން މިހާތަނަށް 9,519 މީހުން ވަނީ އައިސްފައިވެ އެވެ. މިއީ ބޯޑަރު ހުޅުވިފަހުން އައި ޓޫރިސްޓުންގެ 21.5 ޕަސެންޓެވެ.
ރާއްޖޭގައި ޓޫރިސްޓުންނަށް ހިދުމަތް ދޭ 306 ތަނެއްގެ 32,622 އެނދު މިހާރު ހުރީ އޮޕަރޭޝަނަށް ގެނެސްފަ އެވެ. މީގެތެރޭގައި ހިމެނެނީ 120 ރިސޯޓެއްގައި ހުރި 28,390 އެނދާއި 65 ގެސްޓްހައުސްއެއްގައި ހުރި 1,956 އެނދު އަދި 121 ސަފާރީއެއްގައި ހުރި 2,276 އެނދެވެ.
