އަދާ ޖެހުނު އިރުވެސް ފަރުވާއެއް އަދި ވެކްސިނެއްވެސް ކަށަވަރު ވެފައި ނުވާ ކޮރޯނާވައިރަސް ޑިޒީޒް (ކޮވިޑް-19) އަށް، ދުނިޔޭގެ އެކި ކަންކޮޅުތަކުން ޕޮޒިޓިވްވި މީހުންގެ އަދަދު 50 މިލިއަނަށް ވުރެ މައްޗަށް އަރައިފިއެވެ.
ލިބިފައި ވާ އެންމެ ފަހުގެ ތަފާސް ހިސާބުތަކަށް ބަލާއިރު، ދުނިޔޭގެ އެކި ކަން ކޮޅުތަކުން 216 ގައުމަކާ ސަރަހައްދަކުން މި ބަލީގެ ކޭސްތައް ފެނިފައި ވާއިރު، މިހާތަނަށް، ޖުމުލަ 50254287 ކޭސް ވަނީ ރެކޯޑް ކޮށްފައެވެ.
ހޮނިހިރު ދުވަހުގެ ރެކޯޑްތަކަށް ބަލާއިރު އެންމެ ގިނަ އަދަދަކަށް ކޭސް ރިޕޯޓް ކޮށްފައި ވަނީ އެމެރިކާއިންނެވެ. އެމެރިކާއިން ވަނީ 124232 ކޭސް، އިއްޔެ އެކަނިވެސް ރިޕޯޓް ކޮށްފައެވެ. މިއާއެކު އެ ގައުމުން ބަލި ޖެހުނު މީހުންގެ އަދަދު މިވަނީ 10 މިލިއަނަށް ވުރެ މައްޗަށް އަރާފައެވެ. ފާއިތުވީ ހަތަރު-ފަސް ދުވަހަކަށް ބަލާއިރު އެމެރިކާއިން ކޭސް ނަމްބަރު ރިޕޯޓް ކުރަމުން އަންނަނީ 100000 އަށް ވުރެ މަތިންނެވެ.
ކޮވިޑް-19 ޖެހިގެން ދުނިޔޭގެ އެކި ހިސާބުން މިހާތަނަށް 1256114 މީހެއްގެ ފުރާނަ ގެއްލިފައި ވާއިރު، އިއްޔެ މަރުގެ ރިޕޯޓްތައް ވެސް އެންމެ ގިނަ އިން ރެކޯޑް ކުރީ އެމެރިކާއިން ކަން ފާހަގަ ކުރަންޖެހެއެވެ. ރިޔާސީ އިންތިހާބުގެ ފޯރި އެންމެ ގަދަވެފައި ވާ އެމެރިކާއިން، ކޮވިޑް-19 ޖެހިގެން ހޮނިހިރު ދުވަހު 1031 މީހެއްގެ ފުރާނަ ގެއްލިފައި ވާ ކަމަށް މައުލޫމާތު ލިބެއެވެ. ކޮވިޑް-19 ޖެހިގެން އެމެރިކާއިން މީހުން މަރުވާ އަދަދު، 1000 އިން މަތިން ރިޕޯޓް ކުރާތާވެސް މިހާރު 4 ވަރަކަށް ދުވަސް ވެދާނެއެވެ.
ދިވެހިރާއްޖެ ހިމެނޭ ދެކުނު އޭޝިއާ ސަރަހައްދަށް ބަލާއިރު ހޮނިހިރު ދުވަހު އެންމެ ގިނަ އަދަދަކަށް ކޭސް ރެކޯޑް ކުރީ އަވަށްޓެރި އިންޑިއާއިންނެވެ. ރެކޯޑް އަދަދުތަކުން ކޭސް ރިޕޯޓް ކުރުމަށްފަހު ހިސާބަކަށް ބަލި ކޮންޓްރޯލް ކުރެވިފައި އޮތުމަށް ފަހުން އިންޑިއާއިން ކޭސް ފެންނަ މިންވަރު އަނެއްކާވެސް ވަނީ އިތުރު ވާން ފަށާފައެވެ. ހޮނިހިރު ދުވަހު އިންޑިއާއިން 46318 މީހަކު ޕޮޒިޓިވްވިއެވެ. ދެކުނު އޭޝިއާ ސަރަހައްދުން ކޮވިޑް-19 ޖެހިގެން ހޮނިހިރު ދުވަހު އެންމެ ގިނަ ބަޔަކު މަރުވެގެން ރިޕޯޓް ކުރީވެސް އިންޑިއާއިންނެވެ. އިންޑިއާއިން އިއްޔެ 557 މީހަކު ކޮވިޑް-19 ޖެހިގެން މަރުވި ކަމަށް ވަނީ ރެކޯޑް ކޮށްފައެވެ.
ކޮވިޑް-19ގެ ފަރުވާގެ ގޮތުގައި ދުނިޔޭގެ އެކި ހިސާބުތަކުގައި އެކި ކަހަލަ ޑްރަގްތަކާ ތެރަޕީތައް ޓެސްޓު ކުރަމުންދާއިރު، ބަލި ޖެހޭ މީހުންނަށް މިހާރު ފަރުވާ ދެމުން ދަނީ ޕޭޝަންޓުންގެ ހަށިގަނޑުން ފެންނަ އަލާމާތްތަކަށް ބަލައިގެންނެވެ. ކޮވިޑް-19އަށް ޕޮޒިޓިވްވި މީހުންގެ ތެރެއިން ޝިފާ ލިބި، ރަނގަޅު ވި މީހުންގެ އަދަދު މިހާރު ވަނީ 35.5 މިލިއަނަށް ވުރެ މައްޗަށް އަރާފައެވެ.
