މިހާތަނަށް ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެގެން، އެމެރިކާއިން ރެކޯޑް އަދަދަކުން ކޭސް ރިޕޯޓް ކޮށްފިއެވެ.
ޖޯންސް ހޮޕްކިންސް ޔުނިވާސިޓީގެ ރެކޯޑްތައް ދައްކާ ގޮތުން، ހުކުރު ދުވަހު އެމެރިކާއިން، 126480 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ.
މިއީ ކޮވިޑް-19ގެ ބަލިމަޑުކަން ފެށުނު ފަހުން، އެމެރިކާއިން މިހާ ގިނަ އަދަދަކަށް ކޭސް ރެކޯޑް ކުރި ދުވަހެވެ. އަދި 120000 އިން މަތިން ކޭސް ރިޕޯޓް ކުރިތާ ވިދިވިދިގެން 2 ވަނަ ދުވަހެވެ. ހަމަ އެހެންމެ، 100000 އިން މަތިން ކޭސް ރެކޯޑްކުރިތާ ވިދިވިދިގެން 3 ވަނަ ދުވަހެވެ.
ބަލިމަޑުކަމުގައި އެމެރިކާއިން ރެކޯޑް އަދަދުތަކުން ކޭސް ރިޕޯޓް ކުރި ދުވަސްތައް
- ނޮވެމްބަރު 6: 126480 ކޭސް
- ނޮވެމްބަރު 5: 121888 ކޭސް
- ނޮވެމްބަރު 4: 102831 ކޭސް
- އޮކްޓޯބަރު 30: 99321 ކޭސް
- ނޮވެމްބަރު 3: 91530 ކޭސް
ކޮވިޑް-19 ޖެހިގެން ހުކުރު ދުވަހު އެމެރިކާއިން، 1146 މީހެއްގެ ފުރާނަ ގެއްލިފައި ވާކަމަށް މައުލޫމާތު ލިބެއެވެ. މިއީ ކޮވިޑް-19ގައި އެމެރިކާއިން މީހުން މަރުވާ އަދަދު 1000 އިން މަތިން ރެކޯޑް ކުރިތާ، ވިދިވިދިގެން 4 ވަނަ ދުވަހެވެ.
ދުނިޔޭގެ ނިސްބަތުން ބަލާއިރު، މި ބަލި ޖެހުނު މީހުންނާއި، މި ބަލީގައި މަރުވާ މީހުންގެ އަދަދު އަދިވެސް އެންމެ ގިނައީ އެމެރިކާގައެވެ.
