200 އެއްހާ ހިޖުރަވެރިންނާއެކު ވިލާތަށް ދަތުރު ކުރަމުން ދަނިކޮށް ސެނެގޯލްގެ ރަށް ބޭރުން ބޯޓެއް އަޑިއަށް ގޮސް، އެ ބޯޓުން ދަތުރުކުރި 140 މީހެއްގެ ފުރާނަ ގެއްލިފައި ވާ ކަން އދއިން ކަށަވަރު ކޮށްދީފިއެވެ.
މިއީ މިދިޔަ ހޮނިހިރު ދުވަހު ހިނގި ހާދިސާއެއް ނަމަވެސް، މި ވާހަކަ އާންމު ކޮށްފައި ވަނީ، ގާތްގަނޑަކަށް ހަފުތާއެއްހާ ދުވަސް ފަހުން، މިއަދުއެވެ.
އިންޓަނޭޝަނަލް އޯގަނައިޒޭޝް ފޯ މައިގްރޭޝަން (އައިއޯއެމް) އިން ބުނީ، މިދިޔަ ހޮނިހިރު ދުވަހު ދަތުރަށް ފުރިތާ މާ ގިނައިރުތަކެއް ނުވެ ބޯޓުގައި އަލިފާން ރޯވެ، ބޯޓު އަޑިއަށް ދިޔައީ ކަމަށެވެ. މި ހާދިސާގައި 60 އެއްހާ މީހުން ސަލާމަތް ކުރެވިފައި ވާ ކަމަށް ރިޕޯޓްތައް ބުނެއެވެ.
ބެލެވޭ ގޮތުގައި މި ބޯޓު ދަތުރު ކުރަމުން ދިޔައީ ސްޕެއިންގެ ކެނޭރީ އައިލަންޑްސް މަގުން، ވިލާތަށް އެތެރެވުމަށެވެ. މިއީ 2018 ވަނަ އަހަރުން ފަށައިގެން ހުޅަނގު އެފްރިކާ ސަރަހައްދުން ހިޖުރަ ކުރާ މީހުންގެ މެދުގައި މަގުބޫލު ރޫޓެކެވެ.
އދއިން ބުނީ މިދިޔަ ހޮނިހިރު ދުވަހުގެ ހާދިސާއަކީ، މި އަހަރުގެ މިހާތަނަށް ދުނިޔޭގެ އެއްވެސް ހިސާބެއްގައި ހިނގި، މިފަދަ އެންމެ ނުރައްކާތެރި ހާދިސާ ކަމަށެވެ.
ސެނެގޯލްގައި ހުންނަވާ އައިއޯއެމްގެ މަންދޫބު، ބަކާރީ ޑުމްބިއާ ވިދާޅުވީ، ސަރުކާރުތަކުގެ މެދުގައި އެއްބައިވަންތަކަން ގާއިމުކޮށް، ހާލުގައި ޖެހިފައިވާ ޒުވާނުންގެ ނާޖާއިޒު ފައިދާ ނަގައިގެން އިންސާނީ ވަގުފާރި ކުރުމާ ގައިރު ގާނޫނީ ތަކެތި އެތެރެ ކުރުމަށް ކުރާ މަސައްކަތްތައް ހުއްޓުވުމަށް ސަރުކާރުތަކާ، ބައިނަލްއަގުވާމީ މުޖުތަމައާ އެހެނިހެން ބައިވެރިންވެސް އެކަތިގަނޑަކަށް ވާންޖެހޭ ކަމަށެވެ.
ސްޕެއިންގެ ސަރުކާރުން ހާމަ ކުރާ ގޮތުގައި މިއަހަރުގެ މިހާ ހިސާބަށް، ކެނޭރީ އައިލަންޑްސް އަށް 11000 މީހަކު ވަނީ އެތެރެވެފައެވެ. މިދިޔަ އަހަރުގެ މި މުއްދަތުގައި މި އަދަދު އުޅުނީ 2557 ގައެވެ. 2006 ވަނަ އަހަރު، ކެނޭރީ އައިލަންޑްސްއަށް 35000 މީހުން އެތެރެވި ކަމަށް އދއިން ބުނެއެވެ.
މިއަހަރުގެ މިހާ ހިސާބަށް ބަލާއިރު ކެނޭރީ އައިލަންޑްސް ރޫޓުން ދަތުރު ކުރަން އުޅުމުގެ ތެރޭގައި ފުރާނަ ގެއްލިދިޔަ މީހުންގެ އަދަދު 414 އަށް އަރާ ކަމަށް، އައިއޯއެމްއިން ބުނެއެވެ. މުޅި 2019 ވަނަ އަހަރަށް ބަލާއިރު މިއަދަދު އުޅެނީ 210 ގައެވެ.
