މި ގަރުނުގެ ފުރަތަމަ 20 އަހަރަކީ މޫސުމީ ކާރިސާތައް އިތުރުވެގެންދިޔަ އަހަރުތަކެއް ކަމަށް އދއިން އެންމެ ފަހުން އެކުލަވާލި ދިރާސާ ބުނެފިއެވެ.
ހަމަ މިއާއެކު، ބިންހެލުންތަކާ، ސުނާމީ ފަދަ ކާރިސާތަކުން ފެށިގެން ބައޮލޮޖިކަލް ކާރިސާތައް ކަމަށްވާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ ކަރިސާ ފަދަ ހާލަތްތަކަށް މިހާރަށްވުރެ ފުރިހަމައަށް ގައުމުތަކުން ތައްޔާރުވުމަށްވެސް، ކާރިސީ ހިރާސް ކުޑަކުރުމާ ބެހޭ އދގެ އިދާރާ (ޔޫއެންޑީއާރްއާރް) އިން ވަނީ ގޮވާލާފައެވެ.
ބައިނަލްއަގުވާމީ ފެންވަރުގައި މިއަދު ފާހަގަ ކުރަމުންދާ ކާރިސީ ހިރާސް ކުޑަކުރުމުގެ ދުވަހާ ގުޅިގެން ކުރި ޓްވީޓެއްގައި ޔޫއެންޑީއާރްއާރްއިން ބުނީ، ކާރިސާތަކާ ގުޅުން ހުރި ކަންކަން ބެލެހެއްޓުމަކީ، ދިރިހުރުމާއި މަރު، އަނިޔާވުމާ ހެޔޮ ސިއްހަތުގައި ހުރުން އަދި ބޯހިޔާވުމާއި ގެދޮރު ގެއްލުމާ ގުޅިފައިވާ ކަމެއް ކަމަށެވެ.
ދުވަހާ ގުޅުވައިގެން ޔޫއެންޑީއާރްއާރްއިން އާންމު ކޮށްފައިވާ ރިޕޯޓަށް ބަލާއިރު، ފާއިތުވީ 20 އަހަރު ތެރޭގައި ދުނިޔޭގެ އެކި ކަންކޮޅުތަކުން 7348 ކާރިސާ ރެކޯޑް ކޮށްފައިވެއެވެ. މި މުއްދަތުގައި، މިހާދިސާތަކުގައި 1.23 މިލިއަން މީހުންގެ ފުރާނަ ގެއްލި ދިޔައެވެ. އެއީ އަހަރަކަށް ބަލާއިރު ގާތްގަނޑަކަށް 60000 މީހުންނެވެ. އަދި މި ކާރިސާތަކުގެ އަސަރު ފޯރި މީހުންގެ އަދަދު 4 ބިލިއަނަށް އަރާ ކަމަށްވެސް ޔޫއެންޑީއާރްއާރްގެ ރިޕޯޓުން ދައްކައެވެ.
މިއަދު ކުރިމަތިލާންޖެހިފައިވާ ކޮވިޑް-19ގެ ކާރިސާއަކީވެސް، ކާރީސީ ހިރާސް ކުޑަކުރަން ޖެހިފައިވާ މިންވަރު ބަޔާންކޮށްދޭ ސާފު ތަސްވީރެއްކަން ޔޫއެންޑީއާރްއާރްއިން ފާހަގަކުރެއެވެ. ކޮވިޑް-19ގެ އޮއެވަރުން ފުރާނަތަކެއް ސަލާމަތް ކުރަން ހުރިހާ ގައުމެއްހެން ވީ ފެއިލް ކަމަށް އދގެ ދިރާސާ ޓީމުން ފާހަގަކުރެއެވެ.
ފާއިތުވީ 20 އަހަރު ދުވަހު ކުރިމަތިވި ކާރިސާތަކުން ދުނިޔޭގެ އިގުތިސޯދަށް ލިބުނު ގެއްލުމުގެ އަގު، 2.97 ޓްރިލިއަން ޑޮލަރަށް އަރާއިރު، ފަގީރު ގައުމުތަކުން މީހުން މަރުވި ނިސްބަތް، މުއްސަނދި ގައުމުތަކަށްވުރެ 4 ގުނަ އިތުރު ކަންވެސް އދގެ އިދާރާއިން ވަނީ ފާހަގަކޮށްފައެވެ.
މީގެ ކުރިން ފާއިތުވީ 20 އަހަރުގެ މުއްދަތު (1980-1999) އަށް ބަލާއިރު، ދުނިޔޭގެ އެކި ކަންކޮޅުތަކުން ރެކޯޑް ކުރީ 4212 ކާރިސާއެކެވެ. 1.19 މަރުގެ ކޭސް ރެކޯޑް ކުރިއިރު، ކާރިސާގެ އަސަރު ކުރީ 3 ބިލިއަން މީހުންނަށެވެ. އަދި އިގުތިސޯދީ ގެއްލުމުގެ އަގެއް ކަމުގައި ބަޔާންކޮށްފައި ވަނީ 1.63 ޓްރިލިއަން ޑޮލަރެވެ.
