ސަރުކާރާ މެދު ނަފުރަތު އުފައްދާ، ރުޅިވެރިކަމުގެ ރޫހުގައި ހަމަނުޖެހުން އުފެދޭ ގޮތަށް ވާހަކަ ދެއްކެވި ކަމުގެ ކުށުގެ ދައުވާ، ޕާކިސްތާނުގެ ކުރީގެ ބޮޑުވަޒީރު ނަވާޒް ޝަރީފު ފިޔަވާ، އޭނާގެ ޕާޓީގެ އިތުރު މެމްބަރުންގެ މައްޗަށް ނުކުރުމަށް ޕާކިސްތާނުން ނިންމައިފިއެވެ.
ސަރުކާރާ މެދު ނަފުރަތު އުފައްދައިގެން ރުޅިވެރިކަމުގެ ރޫހުގައި ހަމަނުޖެހުން ހިންގުމަށް ހިތްވަރު ދިނުމުގެ ރޫހުގައި ވާހަކަ ދައްކަވާ ކަމުގެ ކުށުގައި، ޕާކިސްތާނު މުސްލިމު ލީގު ނަވާޒް (ޕީއެމްއެލް-އެން)ގެ 41 ލީޑަރެއްގެ ނަން ފާހަގަކޮށް ފައި އޮތް ނަމަވެސް، ނަވާޒް ފިޔަވާ އެހެން ހުރިހާ ލީޑަރުންގެ ނަން ވަނީ އަނބުރާ ގެންގޮސްފައެވެ.
ކޮރަޕްޝަންގެ މައްސަލާގައި ޖަލު ހުކުމެއް ތަންފީޒު ކުރައްވަން ފެއްޓެވުމަށްފަހު ސިއްހީ އިތުރު ފަރުވާ ހޯއްދެއްވުމަށް ކަމަށް ވިދާޅުވެ، ނަވާޒް މިވަގުތު ދިރިއުޅުއްވަމުން ގެންދަވަނީ އިނގިރޭސިވިލާތުގައެވެ.
ސަރުކާރާ މެދު ނަފުރަތު އުފައްދައިގެން ރުޅިވެރިކަމުގެ ރޫހުގައި ހަމަނުޖެހުން ހިންގުމަށް ހިތްވަރު ދޭ ރޫހުގައި ނަވާޒް ވާހަކަދެއްކެވި ކަމަށް ދައުވާ އުފުލާފައިވަނީ ބަދަރު ރަޝީދު ނަމަކަށް ކިއާ މީހެކެވެ. މި މައްސަލަ ކުރިއަށް ދަނީ ލާހޯރްގެ ޝަހްދާރާ ޕޮލީސް ސްޓޭޝަންގައި ކަމަށް މައުލޫމާތު ލިބެއެވެ. ބަދަރު ވަނީ، އިނގިރޭސިވިލާތުގައި ހުންނަވައިގެން ޕާކިސްތާނުގެ ބަދުނާމު ވާ ގޮތަށް ނަވާޒް ވާހަކަދައްކަވާ ކަމަށްވެސް ތުހުމަތު ކޮށްފައެވެ.
ކަން މިހެން އޮތްއިރު، ޕާކިސްތާނުގެ ހައި ކޯޓުން ވަނީ އެގައުމުން ހޯދަން ބޭނުންވެގެން އިއުލާން ކުރާ މީހުންގެ ލިސްޓަށް އެރުވުމުގެ ކުރިން، ގައުމަށް އެނބުރި ވަޑައިގަތުމަށް ނަވާޒްއަށް މުހުލަތެއް ދީފައެވެ. އެގޮތުން، އަންނަ ނޮވެމްބަރު މަހުގެ 24 ވަނަ ދުވަހުގެ ކުރިން ނަވާޡް ޝަރީފު ހާޒިރުވެވަޑައިގަތުމަށް ހައިކޯޓުން ވަނީ ނަވާޒަށް އަމުރު ކޮށްފައެވެ.
