"ރީޖަނަލް އެއާޕޯޓްސް ކޮމްޕެނީ ލިމިޓެޑް" ގެ ނަމުގައި ސަރުކާރުގެ ކުންފުންޏެއް، ރައީސް އިބްރާހީމް މުހައްމަދު ސޯލިހް މިއަދު އުފައްދަވައިފިއެވެ.
ރައީސް އޮފީހުން ބުނީ އެ ކުންފުންޏަކީ ސަރުކާރުން ހިންގަމުން ގެންދާ ސަރަޙައްދީ އެއާޕޯޓްތައް ވިޔަފާރީގެ އުސޫލުން ހިންގުމަށާއި، ސަރުކާރުން ރީޖަނަލް އެއާޕޯޓްސް މެދުވެރިކޮށް ހިންގަމުން ގެންދާ ވައިގެ ބަނދަރުތައް ދެމެހެއްޓެނިވި ގޮތެއްގައި ތަރައްގީކޮށް ހިންގުމަށްޓަކައި އުފެއްދި ކުންފުންޏެއް ކަމަށެވެ.
ރީޖަނަލް އެއާޕޯޓުތައް މެނޭޖު ކުރުމަށް ސަރުކާރުން އިތުރު ކުންފުންޏެއް އުފައްދާފައި ވަނީ އެ އެއާޕޯޓްތައް މެދުވެރިކޮށް ހިންގަމުން ގެންދާ އެއާޕޯޓުތައް ދެމެހެއްޓެނިވި ގޮތެއްގައި ތަރައްގީކޮށް ހިންގަން ޖެހޭކަމަށް ދެކިވަޑައިގަންވާތީ ކަމަށް އެ ކުންފުނި އުފައްދަވާ ނެރުއްވި ގަރާރުގައި ރައީސް ވިދާޅުވެފައި ވެއެވެ.
ރާއްޖޭގެ އެކި ސަރަހައްދުތަކުގައި ރީޖަނަލް އެއާޕޯޓުތައް ތަރައްގީކޮށް ވައިގެ ދަތުރުފަތުރުގެ ދާއިރާ ފުޅާކުރަމުން ދާއިރު، ރާއްޖޭގެ މައި އެއާޕޯޓް ވެލަނާ އިންޓަނޭޝަނަލް އެއާޕޯޓާއެކު ރާއްޖޭގައި މިހާރު ޖުމްލަ 16 އެއާޕޯޓު އެބައޮތެވެ.
އޭގެ ތެރޭގައި އެއާޕޯޓުތަކަކީ އަމިއްލަ ކުންފުނިތަކުން ހިންގާ އެއާޕޯޓުތަކެވެ. އައިލެންޑް އޭވިއޭޝަނުން ބައެއް އެއާޕޯޓުތައް ހިންގާއިރު ރީޖަނަލް އެއާޕޯޓްގެ އިތުރުން ސަރުކާރު ހިއްސާވާ ކުންފުނިތަކުންވެސް އެއާޕޯޓުތައް މެނޭޖުކުރެއެވެ.
