ރައީސް އިބްރާހީމް މުހައްމަދު ސޯލިޙް، ކުވޭތުގެ އަމީރު އައްޝައިހް ސަބާހުލްއަހްމަދު އަލްޖާބިރު އައްސަބާހް އަވަހާރަވުމާ ގުޅިގެން ކުވޭތުގެ ވަލީއަހުދު ނަވާފް އަލް ސަބާހުލްއަހްމަދު އަލްޖާބިރު އައްސަބާހްއަށް ތައުޒިޔާގެ މެސެޖެއް ފޮނުއްވައިފިއެވެ.
ކުވޭތުގެ ވަލީއަހްދަށް ރައީސް ފޮނުއްވި ތައުޒިޔާގެ މެސެޖުގައި ކުވޭތުގެ އަމީރު އަވަހާރަވުމާ ގުޅިގެން ކުވޭތުގެ ރައްޔިތުންނާއި އަމީރުގެ އާއިލާއަށް ލިބުނު ހިތާމައިގައި ބައިވެރިވެ ވަޑައިގަންނަވާކަން ފާހަގަކުރެއްވިއެވެ.
އޭގެ އިތުރުން ކުވޭތުގެ އަމީރަކީ ބައިނަލްއަގްވާމީ މައިދާނުގައި، ހާއްސަކޮށް ސަރަހައްދީ މައްސަލަތައް ހައްލުކުރުމުގައި ވެސް، އިސް ދައުރެއް އަދާކުރެއްވި ލީޑަރެއްކަން ފާހަގަ ކުރައްވާފައި ވެއެވެ. އަދި، އެ އެފަރަތަކީ ރާއްޖެއާއި ވަރަށް ގާތް ގުޅުމެއް ބެހެއްޓެވި ލީޑަރެއްކަމަށާއި ރާއްޖޭގެ ތަރައްގީއަށް ފޯރުކޮށްދިން އެހީތެރިކަމާއި ރާއްޖެއަށް ދެމުން ގެންދިޔަ އެއްބާރުލެއްވުމަށްޓަކައި ދިވެހިން އެ ފަރާތައް ދަރަނިވެރި ވެފައިވާ ލީޑަރެއްކަމުގައި ވެސް ރައީސްގެ މެސެޖުގައި ފާހަގަ ކުރައްވާފައިވެއެވެ.
ކުވޭތުގެ އަމީރު އައްޝައިހް ސަބާހުލްއަހްމަދު އަލްޖާބިރު އައްސަބާހް އަވަހާރަވުމުގެ ހިތާމައިގައި، މިއަދުން ފެށިގެން އަންނަ މަހުގެ 2 ވާ ހުކުރު ދުވަހުގެ ނިޔަލަށް (ތިން ދުވަސް) ދިވެހި ގައުމީ ދިދަ ބައިދަނޑިއަށް ތިރިކުރެއްވުމަށް ރައީސް ވަނީ ނިންމަވާފައެވެ.
