ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ގައި މަރުވި މީހުންގެ އަދަދު 1 މިލިއަނަށް ވުރެ މައްޗަށް އަރައިފިއެވެ.
ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސްކޮވް-2) އަކުން ޖައްސާ، ކޮވިޑް-19 ޖެހިގެން ދުނިޔޭގެ އެކި ކަންކޮޅުތަކުން މިހާތަނަށް 10000658 މީހެއްގެ ފުރާނަ ގެއްލިފައި ވާކަމަށް އެންމެ ފަހުގެ ތަފާސް ހިސާބުތަކުން ދައްކައެވެ.
ކޮވިޑް-19 ޖެހިގެން މިހާތަނަށް އެންމެ ގިނަ އަދަދެއްގެ ބަޔަކު މަރުވެގެން ރިޕޯޓް ކޮށްފައިވަނީ، މި ބަލިޖެހިގެން އެންމެ ގިނަ އަދަދަކަށް ކޭސް ރެކޯޑް ކޮށްފައިވާ އެމެރިކާއިންނެވެ. ކޮވިޑް-19 ޖެހިގެން އެމެރިކާއިން 209291 މީހެއްގެ ފުރާނަ ގެއްލިފައިވާ ކަމަށް ރެކޯޑްތަކުން ދައްކައެވެ. މި ބަލީގައި އެންމެ ގިނަ އަދަދެއްގެ ބަޔަކު ދެން މަރުވީ ބްރެޒިލް، އިންޑިއާ އަދި މެކްސިކޯއިންނެވެ.
ކޮވިޑް-19ގެ ކޭސްތައް ފެނުނު ކަމުގައި ވީ ނަމަވެސް، މިހާތަނަށް މަރުގެ ރިޕޯޓެއް ރެކޯޑް ކޮށްފައި ނުވާ ބައެއް ގައުމުތައްވެސް އެބަހުއްޓެވެ. އެ ގައުމުތަކުގެ ތެރޭގައި ބޫޓާން އަދި ސީޝެލްސް ފާހަގަކުރެވެއެވެ.
ޗައިނާގެ ވޫހާން ސިޓީގައި ގަވައިދާ ހިލާފަށް ވަލުޖަނަވާރުގެ ވިޔަފާރި ކުރަމުންދިޔަ ސީފުޑް މާކެޓް ސަރަހައްދަކުން 2019 ވަނަ އަހަރުގެ ޑިސެމްބަރު މަހުގެ ފަހުކޮޅު ފުރަތަމަ ފަހަރަށް ރިޕޯޓްކުރަން ފެށި ކޮވިޑް-19 އަށް ދުނިޔޭގެ އެކި ކަންކޮޅުތަކުން މިހާތަނަށް ޕޮޒިޓިވްވި މީހުންގެ އަދަދު މިއަދު ވަނީ، 33 މިލިއަންގެ ފާހަގަ ހުރަސްކޮށްފައެވެ.
ކަން މިހެން އޮތް އިރު، ދުނިޔޭގެ ސިއްހަތު ޖަމިއްޔާއިން ވަނީ ކޮވިޑް-19ގައި 2 މިލިއަނެއްހާ މީހުން މި ދުނިޔެއާއި ވަކިވެ ދިއުމުގެ ފުރުސަތު އެބައޮތްކަން ފާހަގަކޮށްފައެވެ.
ކޮވިޑް-19ގެ ބަލިމަޑުކަމަކީ ފާއިތުވީ ގަރުނެއްހާ ދުވަހުގެ ތެރޭގައި މި ދުނިޔެ ދުށް އެންމެ ނުރައްކާތެރި ބަލިމަޑުކަމެވެ. މި ބައްޔަށް ކަނޑައެޅިގެން ވަކި ފަރުވާއެއް އަދިވެސް ހޯދިފައި ނުވާއިރު، ބަލިން ދިފާއުވުމަށް ބޭނުން ކުރާނެ ވެކްސިނެއްވެސް ކަށަވަރުވެފައެއް ނުވެއެވެ.
