ސަރުކާރާ ދެކޮޅަށް ވަރުގަދަ މުޒާހަރާތަކެއް ކުރަމުންދާ އިސްރާއީލުގައި ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް ރެކޯޑް އަދަދަކަށް އިތުރުވަމުން ދާ ދިއުމާ ގުޅިގެން، ދެވަނަ ލޮކްޑައުންއަކަށް ދިއުމަށް، ކަމާ ބެހޭ ފަރާތްތަކުން ފާސްކޮށްފިއެވެ.
އަންނަ ހުކުރު ދުވަހުގެ މެންދުރު ފަހުން ފެށިގެން އިސްރާއީލުގައި ލޮކްޑައުންގެ 2 ވަނަ އަމުރެއް ތަންފީޒު ކުރަން ފަށާއިރު، އޭޕްރިލް މަހު އިއުލާން ކުރި ލޮކްޑައުންއާ މާ ބޮޑު ތަފާތުތަކެއް ނުހުންނާނެ ކަމަށް ޚަބަރު ލިބެއެވެ. އިސްރާއީލުގައި ހުކުރު ދުވަހު ތަންފީޒުކުރަން ފަށާ ލޮކްޑައުންގެ އަމުރުގެ މުހުލަތަކީ 3 ހަފުތާއެއްހާ ދުވަހައެވެ.
ސްކޫލްތަކާ، ރެސްޓޯރަންޓް (އިންޑޯ-ޑައިނިންގް)، މުނިފޫހިފިލުވުމާ ގުޅޭ މާލަންތަކާ އެނޫންވެސް ވިޔަފާރިތައް ބަންދުކުރާއިރު، ޕަބްލިކް ސެކްޓަރުގެ މަސައްކަތްތައް، ހަރުކަށި ނިޒާމެއްގެ ތެރެއިން ކުރިއަށްދާނެ ކަމަށް މައުލޫމާތު ލިބެއެވެ. ނަމަވެސް ޕްރައިވެޓް އިދާރާތައް ހިންގޭނީ، އޮފީސް މާހައުލުން ބޭރުގައި (ވޯކް ފްރޮމް ހޯމް) އުސޫލުން ކަމަށްވެސް މައުލޫމާތު ލިބެއެވެ.
މީގެ އިތުރުން، އަމިއްލަ ގެއިން ފެށިގެން 500 މީޓަރު ދުރު ހިސާބުތަކަށް ދަތުރު ނުކުރެވޭނެ ކަމަށާ، 20 މީހުންނަށްވުރެ ގިނައިން ބޭރު ތެރޭގައި އެއް ތަނެއްގައި ނުތިބެވޭ ގޮތަށް ހަމަޖައްސާފައި ވާއިރު، އެތެރޭގެ މާލަންތަކުގައިވެސް އެއް ވަގުތެއްގައި އެންމެ ގިނަ ވެގެން ތިބެވޭނީ 10 މީހުންނަށް ކަމުގައި ވަނީ ކަނޑައަލާފައެވެ.
އިސްރާއީލުން މިހާތަނަށް 155604 މީހަކު ކޮވިޑް-19އަށް ޕޮޒިޓިވް ވެފައިވާއިރު، 138 މީހަކަށް ވެންޓިލޭޓަރުގައި މިހާރުވެސް ފަރުވާ ދެމުންދާކަމަށް ޚަބަރު ލިބެއެވެ.
