މިއަހަރަށް ލަފާކޮށް ރައްޔިތުންގެ މަޖިލީހުން ފާސްކުރި ދައުލަތުގެ ބަޖެޓު އަލުން މުރާޖައާ ކޮށް މަޖިލީހަށް ހުށަހަޅަން ފިނޭންސް މިނިސްޓްރީން ނިންމައިފިއެވެ.
"ދަ ޕްރެސް" އަށް މައުލޫމާތު ދެއްވަމުން ފިނޭންސް މިނިސްޓްރީން ބުނީ ކޮވިޑް-19އާ ގުޅިގެން ބޮޑެތި ބަދަލުތަކެއް އައިސްފައިވާ ކަމަށާއި ރިވިއު ބަޖެޓެއް މަޖިލީހަށް ހުށަހެޅުމަށް މީގެ ކުރިންވެސް ސަރުކާރުން ވަނީ ނިންމަވާފައި ކަމަށެވެ.
އެގޮތުން ރިވައިޒްޑް ބަޖެޓު ހުށަހަޅާނެ ކަމަށާއި ނަމަވެސް ބަޖެޓަށް ގެންނަ ބަދަލުތަކުގެ ތަފްސީލު ހާމަ ކުރައްވާނީ މަޖިލީހަށް ހުށަހެޅުމަށް ފަހު ކަމަށްވެސް ފިނޭންސުން މައުލޫމާތު ދެއެވެ.
ތަފްސީލުތައް ހާމަ ނުކުރި ނަމަވެސް ފިނޭންސުން ބުނީ، ކޮވިޑާ ގުޅިގެން ނުފެށި ހުރި ޕްރޮޖެކްޓްތައް މަޑުޖައްސާލުމާއި ގިނަ އޮފީސްތަކެއްގެ ބަޖެޓުން ގިނަ ބައިތަކެއް ކަނޑާފައިވާނެ ކަމަށެވެ.
މިއަހަރަށް ލަފާކޮށް ފާސްކޮށްފައި ވަނީ 37 ބިލިއަން ރުފިޔާގެ ބަޖެޓެކެވެ. އާމްދަނީގެ ގޮތުގައި ދައުލަތަށް 29.9 ބިލިއަން ރުފިޔާ ލިބޭނެ ކަމަށް ލަފާކުރި ނަމަވެސް ކޮވިޑް-19އާ ގުޅިގެން އިގްތިސޯދަށް އައިސްފައިވާ ހީނަރުކަމާއެކު މިހާރު ފިނޭންސް މިނިސްޓްރީން ލަފާކޮށްފައި ވަނީ އެންމެ ރަނގަޅު ހާލަތުގައި ވެސް އާމްދަނީގެ ގޮތުގައި ލިބޭނީ 15.2 ބިލިއަން ރުފިޔާ ކަމަށެވެ.
މި އަހަރުގެ ބަޖެޓު މުރާޖައާ ކުރުމަށް ނިންމާފައި ވާއިރު، 2021 އަށް ލަފާކުރާ ދައުލަތުގެ ބަޖެޓު އޮކްޓޯބަރު މަސް ނިމުމުގެ ކުރިން މަޖިލީހަށް ފޮނުވާނެ ކަމަށް ފިނޭންސް މިނިސްޓްރީން ވަނީ ބުނެފައެވެ.
