އެމެރިކާގެ ހުޅަނގުގެ ސަރަހައްދުތަކުގައި ރޯވަމުންދާ ވަރުގަދަ އަލިފާންގަނޑުތައް ބޮޑު ހިސާބަކަށް ފެތުރި، އެތައް ސަތޭކަ ގެއެއް ހަލާކުވެ، ހިނގި އެކި ހާދިސާތަކުގައި މަރުވި މީހުންގެ އަދަދު 7 އަށް އަރާފައި ވާ ކަމަށް، އެމެރިކާގެ ކަމާބެހޭ އޮފިޝަލުން ހާމަ ކުރައްވައިފިއެވެ.
ފުލުހުން މައުލުމާތު ދެއްވާ ގޮތުގައި ފާއިތުވީ 48 ގަޑިއިރުގެ ތެރޭގައި ކެލިފޯނިއާގެ އުތުރުގެ ސަރަހައްދުން 3 މީހަކު، އޮރެގަންއިން 3 މީހަކު އަދި ވޮޝިންގްޓަން ސްޓޭޓްއިން 1 އަހަރުގެ ތުއްތު ކުއްޖެއްގެ ފުރާނަ ވަނީ ގެއްލިފައެވެ. އޮރެގަން އިން މަރުވި މީހުންގެ ތެރޭގައި 12 އަހަރުގެ ފިރިހެން ކުއްޖަކުވެސް ހިމެނެއެވެ.
މައުލޫމާތު ލިބޭ ގޮތުގައި ރޯވަމުންދާ އަލިފާންގަނޑުތަކުގެ ނުރައްކާ އެންމެ ބޮޑުވެފައި ވަނީ އޮރެގަންއަށެވެ. ވެސްޓް ކޯސްޓް ސްޓޭޓްސް ސަރަހައްދުގައި 100 އަށްވުރެ ގިނަ އަލިފާންގަނޑު ރޯވެ އަނދަމުންދާއިރު، އަލިފާން ނިއްވުމުގެ މަސައްކަތުގައި 3000 އެއްހާ ފަޔާފައިޓަރުން ދަނީ ހަރަކާތްތެރިވަމުންނެވެ.
އޮރެގަންގައި ރޯވެ އަނދަމުންދާ އަލިފާންގަނޑުތަކަކީ އާދަޔާ ހިލާފަށް ހޫނުގަދަވުމުގެ ސަބަބުން ގަސްތައް އަނދައިގެން ހިނގަމުންދާ ހާދިސާތަކެއް ކަމަށް މައުލޫމާތު ލިބެއެވެ. ކެލިފޯނިއާގައި އަލިފާންގަނޑުތައް ރޯވާން ފެށީ، ޖެންޑާ ރިވީލް ޕާޓީއެއްގައި ގޮވާޒާތުގެ އެއްޗެއް ބޭނުން ކުރުމުން ކަމަށްވެސް ޚަބަރު ފެތުރެނެވެ.
ބޮޑު ސަރަހައްދެއްގައި ރޯވެ އަނދަމުން ދިއުމުގެ ސަބަބުން ދުވާލެއް ރޭގަނޑެއް ވަކި ކުރަން ދަތިވާ ވަރަށް ވެށި އަނދިރިވެފައިވާއިރު، މުޅި މާހައުލު އޮންނަނީ އަލިފާނުގެ އޮރެންޖު ކުލައެއްގައި ކަމަށް މީޑިއާގައި ދައުރުވާ މަންޒަރުތަކުން ސިފަވެއެވެ.
އެމެރިކާގެ ހުޅަނގުގެ ސަރަހައްދުތަކުގައި ވަރުގަދަ އަލިފާންގަނޑުތައް ރޯވަމުންދާއިރު، ނުރައްކާ އޮތް ސަރަހައްދުތަކުން އެހެން ހިސާޞުތަކަށް މީހުން ބަދަލު ކުރުމަށް ހިންގާ އިވަކުއޭޝަން އޮޕަރޭޝަންތައް މިހާރުވެސް ދަނީ ކުރިއަށެވެ.
