ސްރީލަންކާގެ ރަށް ބޭރު ސަރަހައްދުގައި ހާލުގައި ޖެހިފައިވާ ޕެނަމާގެ ތެޔޮ ޓޭންކަރުގައި ރޯވެފައިވާ އަލިފާންގަނޑު ކޮންޓްރޯލް ކުރެވިފައި ވާ ކަމަށް، ސްރީލަންކާގެ ކަނޑުގެ އަސްކަރިއްޔާއިން ހާމަކޮށްފިއެވެ.
އެތައް ޓަނެއްގެ ތެޔޮ ބަރުކޮށްގެން ކުވައިތުން ފުރައިގެން އިންޑިއާއަށް ދަތުރު ކުރަމުން ދިޔަ އެމްޓީ ނިއު ޑައިމަންޑް ތެޔޮ ޓޭންކަރުގައި ރޯވި އަލިފާންގަނޑު ކޮންޓްރޯލް ކޮށްފައިވާއިރު، މިހާރު މަސައްކަތް ކުރަމުންދަނީ މާ ސިންގާ ކަނޑުގެ ފުން ސަރަހައްދަކަށް ބޯޓު ޓޯ ކުރުމުގެ މަސައްކަތް ކަމަށް ލަންކާގެ ކަނޑުގެ އަސްކަރިއްޔާގެ ތަރުޖަމާނަކު ވަނީ ހާމަ ކުރައްވާފައެވެ.
ކަނޑާއި ވައިގެ އަސްކަރިއްޔާގެ ގުޅިފައިވާ ބައިނަލްއަގުވާމީ ޓީމުތަކުން ކުރި މަސައްކަތުން ކޮންޓްރޯލް ކުރި އަލިފާންގަނޑަކީ، ތެޔޮ ޓޭންކަރުގެ އިންޖީން ރޫމްގައި ހުރި ބޮއިލަރެއް ގޮވައިގެން ރޯވި އަލިފާންގަނެއް ކަމަށް މައުލޫމާތު ލިބެއެވެ. ބޮއިލަރު ގޮވި ހާދިސާގައި ބޯޓުގެ ކުރޫގައި ހިމެނުނު ފިލިޕީންސްއަށް ނިސްބަތްވާ ފަޅުވެރިއެއްގެ ފުރާނަ ގެއްލިފައިވާކަމަށް ޚަބަރު ލިބެއެވެ. ބޯޓުގައި ބާކީ ތިބި 22 ފަޅުވެރިން ސަލާމަތް ކޮށްފައިވާއިރު، އޭގެ ތެރޭގައި ހިމެނެނީ ފިލިޕީންސްގެ 18 މީހަކާ، ގްރީސްގެ 5 މީހެކެވެ.
ބޯޓުގައި ރެނދުލާފައިވާކަމަށް އިންޑިއާގެ ކޯސްޓް ގާޑުން ހާމަކޮށްފައި ވީ ނަމަވެސް، ބޯޓުން ތެޔޮ ބޭރުވެ ނުރައްކާތެރި ކާރިސާއެއް ހިނގާ، ގެއްލުންތަކެއް ވުމުގެ ފުރުސަތު ނެތް ކަމަށް ސްރީލަންކާގެ ކަނޑުގެ އަސްކަރިއްޔާއިންވަނީ ހާމަކޮށްފައެވެ. ދިވެހިރާއްޖޭގެ ކޯސްޓްގާޑުގެ ވާހަކަވެސް ހުރީ މިފަދަ ގޮތަކަށެވެ.
ލިބެމުންދާ އެންމެ ފަހުގެ މައުލޫމާތަށް ބަލާއިރު އެމްޓީ ނިއު ޑައިމަންޑްގެ ބެލެނިވެރި ކުންފުނިން މިހާރު ވަނީ، ބޯޓު ފުންކުރުމުގެ މަސައްކަތް، ބައިނަލްއަގުވާމީ ކުންފުންޏަކާ ހަވާލުކޮށްފައެވެ. މި ޓީމު، ލަންކާއަށް ދާނެ ކަމަށް ބެލެވެނީ ހޯމަ ދުވަހުގެ ވަގުތެއްގައެވެ.
