ރާއްޖެއިން ކޮވިޑް-19އަށް ޕޮޒިޓިވްވި މީހުންގެ ތެރެއިން ބަލިން ރަނގަޅުވި މީހުންގެ އަދަދު 5000 އިން މައްޗަށް އަރައިފިއެވެ.
އެޗްޕީއޭން ހާމަކޮށްފައިވާ ގޮތުގައި މިއަދު ޕޮޒިޓިވް ވެފައިވަނީ 89 މީހުންނެވެ. މިއާއެކު ރާއްޖެއިން ޕޮޒިޓިވްވި މީހުންގެ ޖުމްލަ އަދަދު މިވަނީ 7667 އަށް އަރާފައެވެ.
އަދި މިބަލިން ރަނގަޅުވި މީހުންގެ އަދަދު މިވަނީ 5036 އަށް އަރާފައެވެ. އަދި މިވަގުތު ބަލި ޖެހި ފަރުވާ ހޯދަމުން ދަނީ 2597 މީހުންނެވެ. އެހެންކަމުން ބަލި ޖެހިފައިވާ މީހުންނަށްވުރެ ރަނގަޅުވި މީހުން މިވަނީ އިތުރުވެފައެވެ.
މިއަދު ޕޮޒިޓިވްވި މީހުންގެ ތެރޭގައި ހިމެނެނީ 63 ދިވެހިންނާއި ބަންގްލަދޭޝް އަށް ނިސްބަތްވާ 20 މީހަކާއި އިންޑިއާގެ 5 މީހެއްގެ އިތުރުން ލަންކާ މީހެކެވެ.
މިވަގުތު މިބަލި ޖެހިފައިވާ 2597 މީހުން އުޅޭއިރު، އެމީހުންގެ ތެރެއިން 181މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ. އަދި 1486 މީހަކު އައިސޮލޭޝަން ފެސިލިޓީތަކުގައި އެބަތިއްބެވެ.
މިހާތަނަށް އައި އިރު ރާއްޖެއިން މި ބަލި ޖެހިގެން 28 މީހަކު ވަނީ މަރުވެފައެވެ. އޭގެ ތެރޭގައި ހިމެނެނީ 22 ދިވެހިންނާއި 6 ބިދޭސީންނެވެ.
