އަވަށްޓެރި އިންޑިއާއިން އިއްޔެ ރެކޯޑް އަދަދަކަށް މީހުން ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެފައިވާކަމަށް އެގައުމުގެ ސިއްހަތާ ބެހޭ ވުޒާރާއިން އާންމުކުރި ތަފާސް ހިސާބުތަކުން ދައްކައިފިއެވެ.
ލިބިފައިވާ އެންމެ ފަހުގެ މައުލޫމާތަށް ބަލާއިރު، ބުދަ ދުވަހު އިންޑިއާއިން، 75760 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. މިއީ އެގައުމުން މި ބަލީގެ ކޭސްތައް ރިޕޯޓްކުރަން ފެށިފަހުން، މިހާތަނަށް ރެކޯޑް ކުރި އެންމެ މަތީ އަދަދެވެ.
އިންޑިއާއިން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 3.31 މިލިއަނަށްވުރެ މައްޗަށް އަރާފައެވެ. މީގެ ތެރެއިން، 2.5 މިލިއަން މީހަކަށް ޝިފާ ލިބި، ރަނގަޅުވެފައިވާކަމަށާ، މިވަގުތު އެކްޓިވް ކޭހުގެ ގޮތުގައި އުޅެނީ 725000 ކޭހެއް ކަމަށްވެސް އިންޑިއާގެ ސިއްހަތާ ބެހޭ ވުޒާރާއިން ޚަބަރު ދެއެވެ.
ކޮވިޑް-19 ޖެހޭ މީހުންގެ ތެރެއިން ޝިފާ ލިބި ރަނގަޅުވި މީހެއް ކަމަށް އިންޑިއާއިން ނިންމާ އުސޫލުތަކަށް ވަނީ ބަދަލު ގެނެސްފައެވެ. އެގޮތުން ބަލިޖެހޭ މީހުން ބަލިން ރަނގަޅުވިކަމަށް ނިންމުމަށް ޓެސްޓު ކުރާކަށް ނުޖެހެއެވެ. ބަލީގެ އަލާމާތްތައް ކުޑަކޮށް ފެންނަ ޕޭޝަންޓެއް ނަމަ، އެމީހެއްގެ ހަށިގަނޑުން ބަލީގެ އަލާމާތްތައް ފެންނަން ފަށާތާ 10 ދުވަސް ވުމުން ވަކި ޝަރުތުތަކެއް ފުރިހަމަ ވާ ނަމަ، އެއީ ޝިފާ ލިބިފައިވާ މީހެއް ކަމަށް ކަނޑައަޅެއެވެ. ނަމަވެސް ސީރިއަސް ޕޭޝަންޓުން ރަނގަޅުވިކަމަށް ނިންމަނީ، ކޮވިޑް-19އަށް ޓެސްޓު ކޮށް، ނެގެޓިވް ވުމުންނެވެ.
އިންޑިއާއިން ކޮވިޑް-19 ޖެހިގެން މަރުވި މީހުންގެ އަދަދު ވަނީ 60472 އަށް އަރާފައެވެ.
ކަން މިހެން އޮތްއިރު، ވެސްޓް ބެންގޯލް ސަރަހައްދުގައި އިއުލާން ކޮށްފައިވާ ލޮކްޑައުން އަމުރުގެ މުހުލަތު ވަނީ އިތުރު ކޮށްފައެވެ. މި މުއްދަތު ހަމަވާނީ ސެޕްޓެމްބަރު 20 ގައި ކަމަށް މައުލޫމާތު ލިބެއެވެ.
