ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް އެންމެ ގިނަ އަދަދަކަށް ރެކޯޑް ކޮށްފައިވާ އެމެރިކާއިން، މި ބައްޔަށް ސްކްރީން ކުރުމަށް ޓެސްޓު ކުރާ ގައިޑްލައިންއަށް ބަދަލުތަކެއް ގެނެސްފިއެވެ.
އެމެރިކާގެ ސެންޓާޒް ފޮ ޑިޒީޒް ކޮންޓްރޯލް (ސީޑީސީ) އިން އަދާހަމަކުރި ގައިޑްލައިން ބުނާ ގޮތުގައި، ކޮވިޑް-19 ޖައްސާ، ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސްކޯވް-2)ގެ ނުރައްކަލަށް ހުށަހެޅިފައިވާ ހުރިހާ އެންމެން، މި ބައްޔަށް ޓެސްޓު ކުރާކަށް ނުޖެހެއެވެ.
އެމީހަކީ ކޮވިޑް-19އަށް ޕޮޒިޓިވްވެފައި ވާ މީހަކާ، އެކީ އެއްތާ ވީ މީހަކަށް ވީ ކަމުގައި ވާ ނަމަވެސް، ކޮންމެހެން ޓެސްޓު ކުރަން ނުޖެހޭ ކަމަށް ސީޑީސީގެ އާ ގައިޑްލައިންގައި ބުނެއެވެ.
ސީޑީސީގެ އާ ގައިޑްލައިން ބުނާ ގޮތުގައި އެމީހަކީ ކޮވިޑް-19އަށް އިންފެކްޓް ވެފައިވާ 6 ފޫޓުން ގާތްވެ، 15 މިނެޓް ވަންދެން އެކުގައި ވި މީހެއް ކަމުގައި ވީ ނަމަވެސް، ކޮންޓެކްޓްވި މީހާގެ ހަށިގަނޑުގެ ބޭރުފުށުން ބަލީގެ އެއްވެސް އަލާމާތެއް ނުފެންނަ ނަމަ ޓެސްޓު ކުރާކަށް ނުޖެހެއެވެ. ނަމަވެސް ކޮންޓެކްޓްވި މީހަކީ ބަލީގެ ނުރައްކާ ގިންތީގައި ހިމެނޭ މީހަކަށް ވެއްޖެނަމަ ނުވަތަ ސިއްހީ އެހީތެރިން ލަފާ ދީފި ހިނދެއްގައި ޓެސްޓު ކުރަންޖެހޭ ކަމަށް ވެސް އިސްލާހުގައި ބުނެފައިވެއެވެ.
ކޮވިޑް-19އަށް އިންފެކްޓް ވުމަށް ފަހުގައިވެސް ބަލީގެ އެއްވެސް އަލާމާތެއް ނުފެނި ހުރެދާނެ ކަމަށް ސަމާލުވުމަށްވެސް ސީޑީސީއިން ވަނީ ގޮވާލާފައެވެ.
ކޮވިޑް-19އަށް ޓެސްޓު ކުރަން ސާމްޕަލް ނެގުމަށްފަހު ނަތީޖާ ލިބުމާ ހިސާބަށްވެސް އަމިއްލައަށް ކަރަންޓީނުވެގެން، އެހެން މީހުންނާ އެކަހެރިކޮށް ހުރުމަށް ސީޑީސީއިން އިރުޝާދުދެއެވެ.
