މިވަގުތު ދުނިޔޭގައި ހުރި އެންމެ ހަލުވި ދުވުންތެރިޔާ އަދި 8 ފަހަރެއްގެ މަތިން އޮލިމްޕިކް ރަން މެޑަލް ހާސިލު ކޮށްފައިވާ އުސައިން ބޯލްޓްވެސް ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވެއްޖެއެވެ.
މާސްކާ ބީރައްޓެހި ގޮތެއްގައި ކުރިއަށް ގެންދިޔަ 34 ވަނަ އުފަން ދުވަހުގެ ޕާޓީއަށް ހަފުތާއެއް ވީއިރު، ކޮވިޑް-19އަށް ޕޮޒިޓިވްވެފައިވާ އުސައިން ބޯލްޓް މިހާރު ހުރީ ސެލްފް އައިސޮލޭޝަންގައެވެ. އޭނާ އައިސޮލޭޝަން ފުރިހަމަ ކުރަމުންދަނީ ޖަމައިކާގައި އޭނާ ދިރިއުޅެމުންދާ ގޭގައެވެ.
ވިދިވިދިގެން 3 ފަހަރު މަތިން 100 އަދި 200 މީޓަރު ދުވުމުން ރަން މެޑަލް ހޯދާފައިވާ ހަމައެކަނި ދުވުންތެރިޔާގެ ގޮތުގައި މަޝްހޫރު ވެފައިވާ ދުނިޔޭގެ އެންމެ ހަލުވި ސްޕްރިންޓާ، އުސައިން ބޯލްޓަށް ކޮވިޑް-19 ޖެހިފައިވާކަން، ޖަމައިކާގެ ސިއްހަތާ ބެހޭ ވުޒާރާއިންވެސް ވަނީ ކަށަވަރުކޮށްދީފައެވެ.
އުސައިން ބޯލްޓް ބުނާ ގޮތުގައި އޭނާގެ ހަށިގަނޑުން ބަލީގެ އެއްވެސް އަލާމާތެއް ނުފެނެއެވެ. ނަމަވެސް، އޭނާ ކޮވިޑް-19އަށް ޓެސްޓު ކުރީ، އުފަން ދުވަހުގެ ޕާޓީ ބޭއްވިތާ އެއް ދުވަސް ފަހުން ކަމަށް ޚަބަރު ލިބެއެވެ.
ބޯލްޓަށް އަވަސް ޝިފާއެއް ލިބުމަށް އެދި ބައެއް މީހުން މެސެޖުތައް ހިއްސާކުރަމުންދާއިރު، އަނެއް ބަޔަކު ދަނީ މާސްކާ، ޖިސްމާނީ ގައިދުރުކަމާ ނުލާ ޕާޓީ ބޭއްވިކަން ފާހަގަކޮށް، އޭނާއަށް ފާޑުކިއުންތައް އަމާޒު ކުރަމުންނެވެ.
ޖައިމާކާއިން ކޮވިޑް-19ގެ ކޭސްތައް ފެންނަ މިންވަރު އިތުރުވާން ފަށާފައިވާއިރު، މިއީ ބޯޑަރު ހުޅުވާލުމުގެ ސަބަބުންނާ، ދިގު ހަފުތާ ބަންދު ލިބުމުގެ ސަބަބުން އެކި ކަހަލަ މުނާސަބާތައް ބޭއްވުމުން ވީ ގޮތެއް ކަމަށް އެ ގައުމުގެ ކަމާބެހޭ ފަރާތްތަކުން ބުނެއެވެ.
