އެސެޓް ރިކަވަރީ ކޮމިޝަންގެ ރައީސް އަހުމަދު އައްސަދުގެ މައްޗަށް ތުހުމަތު ކުރެވޭ ކޮރަޕްޝަނުގެ މައްސަލަ އަލުން ރިވިއުކުރަން އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލް އޮފީހުގައި އެދިއްޖެއެވެ.
'ދަ ޕްރެސް' އަށް މަލޫމާތު ލިބިފައިވާ ގޮތުގައި އޭސީސީން ގިނަ މައްސަލަަތަކެއް ރިވިއު ކުރުމަށް އެދި ޕީޖީއަށް ވަނީ ފޮނުވާފައެވެ. އޭގެތެރޭގައި އައްސަދުގެ މައަސަލައެއްވެސް ވަނީ ހުށަހަޅާފައެވެ.
އޭސީސީން ބުނީ، ގިނަ މައްސަލަތަކެއް މިވަގުތު ރިވިއު ކުރަމުން ދާ ކަމަށާއި އެއީ ކޮން މައްސަލަތަކެއް ކަން މީޑިއާއަށް ހަމާކުރަން ބޭނުން ނުވާ ކަމަށެވެ.
ފިނޭންސް މިނިސްޓްރީގެ ސްޓޭޓް މިނިސްޓަރަކަށް އައްސަދު ހުންނެވި އިރު، ގުރުއާން ތަރުޖަމާ ޗާޕްކުރުމުގެ މަސައްކަތުގައި ކޮރަޕްޝަނުގެ އަމަލެއް ހިންގި ކަމަށް ކުރިން ވަނީ މައްސަލަ ހުށަހަޅާފައެވެ. އެ މައްސަލައިގައި އައްސަދަށް ޖިނާއީ ދައުވާ ކުރި ނަމަވެސް މައްސަލަ ފަހުން ވަނީ އަނބުރާ ފޮނުވާލާފައެވެ. އޭރު އެ މައްސަލަ ފޮނުވާލި ސަބަބެއް ނޭނގެއެވެ.
އައްސަދަކީ އެސެޓް ރިކަވަރީ ކޮމިޝަނުގެ ރައީސެވެ. އޭނާ ގެންދަވަނީ ދައުލަތުގެ އެތައް މުއައްސަސާއެއްގެ 300 އަށް ވުރެ ގިނަ ބަޔަކަށް ސީދާ ގޮތުންނާއިި ނުސީދާ ގޮތުން މަންފާ ލިބިފައިވާ އެމްއެމްޕީއާރުސީ ހިޔާނާތް ބައްލަވަމުންނެވެ. އެ ހިޔާނާތުން މަންފާ ލިބުނު މީހުންގެ ތެރޭގައި އޭސީސީގެ ކުރީގެ ބައެއް މެންބަރުންވެސް ހިމެނިފައި ވާ ކަމަށް ވަނީ މައުލޫމާތު ލިބިފައެވެ.
