ހައިކޯޓްގެ އިސްފަނޑިޔާރު ކަމުގެ މަގާމުން ސުޖާއު އުސްމާން ވަކިކުރަން މަޖިލީހަށް ފޮނުވުމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފިއެވެ.
'ދަ ޕްރެސް' އަށް މައުލޫމާތު ދެމުން ޖޭއެސްސީން ބުނީ، އެގޮތަށް ނިންމީ، ޖޭއެސްސީއިން މިއަދު ބޭއްވި ބައްދަލުވުމުގައި ކަަމަށެވެ. ނަމަވެސް އެކަމާ ގުޅޭ ތަފްސީލެއް ޖޭއެސްސީން އަދި ހާމައެއް ނުކުރެއެވެ.
ޝުޖާއު އުސްމާން ވަކިކުރުމުގެ މައްސަލަ މަޖިލީހަށް ފޮނުވަން ނިންމި އިރު، އޭނާ ހުރީ ސަސްޕެންޑު ކޮށްފައެވެ. އޭނާ ސަސްޕެންޑު ކުރީ ޖޭއެސްސީން ބަލަމުން އަންނަ ދެ މައްސަލައަކާ ގުޅިގެންނެވެ.
އެއީ 2018 ވަނަ އަހަރު ބޭއްވި ރިޔާސީ އިންތިޚާބުގެ ކެމްޕޭންގެ ތެރޭގައި ގއ. ގެމަނަފުއްޓަށް ނުރަސްމީ ދަތުރެއް ކޮށް ރިޔާސީ ކެންޑިޑޭޓަކަށް ވޯޓު ހޯދުމަށް މަސައްކަތް ކުރި މައްސަލައަކާއި ކްރިމިނަލް ކޯޓުގެ އަމުރެއްގެ ދަށުން ބަންދުކޮށްފައި ހުރި ގެމަނަފުށީ މީހެއްގެ އާއިލާގެ މީހުންނާ ބައްދަލުކޮށް، އެމީހުންގެ ވޯޓު ލިބިއްޖެ ކަމުގައި ވާ ނަމަ ބަންދުގައި ހުރި މީހާ މިނިވަން ކުރާނެ ކަމުގެ މަޝްވަރާ ކޮށްފައި ވާ ކަމަށް ތުހުމަތު ކުރެވޭ މައްސަލައެކެވެ.
އެ މައްސަލައިގެ ތަހުގީގު ނިމުމުން ޖަވާބުދާރީވާން ހަތް ދުވަހުގެ މުއްދަތެއް ފަނޑިޔާރު ޝުޖާއުއަށް ދީފައިވެއެވެ. ފަނޑިޔާރެއްގެ ސުލޫކާ ހިލާފު ގިނަ ތުހުމަތުތަކެއް މީގެ ކުރިންވެސް ކުރެވިފައިވާ ޝުޖާއު ވަގުތީ ގޮތުން މަގާމުން ދުރުކޮށްފައި ވަނީ ދެ މަސް ދުވަހަށެވެ. އެއީ މިދިޔަ ޖުލައި މަހުގެ 22 ވަނަ ދުވަހުއެވެ.
ޝުޖާއު އުސްމާނު ހައިކޯޓުގެ ފަނޑިޔާރުކަމުގެ މަގާމަށް އައްޔަން ކުރެއްވީ ރައީސް ޔާމީންގެ ވެރިކަމުގައި 2015 ވަނަ އަހަރުގެ ޖޫން މަހުއެވެ. ޝުޖާއަށް ހައިކޯޓުގެ އިސްފަނޑިޔާރުކަން ދިނީ، ރިޔާސީ އިންތިޚާބުގެ ކުޑަ ދުވަސްކޮޅެއް ކުރިންނެވެ.
