ފާއިތުވެދިޔަ 24 ގަޑިއިރަކީ މުޅި ދުނިޔޭގައިވެސް ރެކޯޑް އަދަދަކަށް، ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް ރިޕޯޓްކުރި ވަގުތެއް ކަމަށް، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އިން އާންމު ކުރި އާދީއްތަ ދުވަހުގެ ރިޕޯޓް ބުނެފިއެވެ.
އެގޮތުން، 24 ގަޑިއިރުގެ ތެރޭގައި ދުނިޔޭގެ އެކި ކަންކޮޅުތަކުން 230370 އާ ކޭސް ރިޕޯޓް ކޮށްފައިވާކަމަށް ޑަބްލިއުއެޗްއޯއިން ބުނެއެވެ. މިއާއެގެ ޑަބްލިއުއެޗްއޯއަށް ރިޕޯޓްކޮށްފައިވާ ކޮވިޑް-19ގެ ކޭސްތަކުގެ އަދަދު ވަނީ 12552765 އަށް އަރާފައެވެ.
އިއްޔެގެ ނިޔަލަށް ދެން އެންމެ ގިނަ އަދަދަކަށް ކޮވިޑް-19ގެ ކޭސްތައް ރިޕޯޓްކޮށްފައިވަނީ ޖުލައި 10 ވަނަ ދުވަހުއެވެ. އެ ދުވަހު ރިޕޯޓްކުރީ 228102 އާ ކޭހެވެ.
ކޮވިޑް-19 ޖެހިގެން 24 ގަޑިއިރުގެ ތެރޭގައި 5285 މީހުން މަރުވި ކަމަށް ޑަބްލިއުއެޗްއޯގެ އާދީއްތަ ދުވަހުގެ ރިޕޯޓް ބުނާއިރު، އެ އިދާރާއަށް ރިޕޯޓްކޮށްފައިވާ މަރުގެ ކޭސްތަކުގެ ޖުމުލަ އަދަދު 561617 އަށް އަރައެވެ.
ކޮވިޑް-19ގެ ބަލިމަޑުކަން ކޮންޓްރޯލް ކުރުމަށް ގައުމުތަކުން ތަންފީޒު ކުރަން ފެށި ހަރުކަށި ފިޔަވަޅުތަކަށް ބައެއް ގައުމުތަކުން ދޫދޭން ފެށުމާއެކު، މި ވަގުތަކީ ގިނަ ގައުމުތަކަކުން ރެކޯޑް އަދަދަކަށް ކޭސް ރިޕޯޓް ކުރަމުންދާ ދަނޑިވަޅެކެވެ. ޑަބްލިއުއެޗްއޯއިންވަނީ، ބަލިމަޑުކަމުގެ ނިމުން އަދި ގާތް ނުވާ ކަމުގެ އިންޒާރު ދީފައެވެ. އަދި މިވަގުތު ކުރިމަތިލާންޖެހިފައިވާ އެންމެ ބޮޑު ނުރައްކަލަކީ، ބައްޔާ ދެކޮޅަށް ހަނގުރާމަ ބައިނަލްއަގުވާމީ ލީޑާޝިޕް ނެތުމާ، އެއްބައިވަންތަކަން ނެތުން ކަމަށް ޑަބްލިއުއެޗްއޯގެ އިސްވެރިޔާ ޑރ ޓެޑްރޯޒް އެޑަނޮމް ގެބްރިޔޭސޫސް ވަނީ ސިފަކުރައްވާފައެވެ.
