ދުނިޔެ ދެކެމުން މިދާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގެ ހާލަތު، ކުރިއަށް އޮތް ތަނުގައި އަދަށް ވުރެ ގޯސްވުމުގެ ފުރުސަތު އަދިވެސް އެބައޮތް ކަމުގެ އިންޒާރު، ދުނިޔޭގެ ސިއްހަތާ ބެހޭ ޖަމިއްޔާ (ޑަބްލިއުއެޗްއޯ)އިން ދީފިއެވެ.
ގައުމުތަކުގެ ސަރުކާރުންތަކުން އެކަސީގެންވާ ރަނގަޅު ފިޔަވަޅުތަކެއް މިހާރު އަޅަން ނުފަށައިފިނަމަ، ގިނަ އަދަދެއްގެ ބަޔަކަށް މި ބަލިޖެހުމުގެ ފުރުސަތު އެބަ އޮތް ކަމުގެ އިންޒާރުވެސް ޑަބްލިއުއެޗްއޯގެ ޑައިރެކްޓާ ޖެނެރަލް ޑރ ޓެޑްރޯޒް އެޑަނޮމް ގެބްރިޔޭސޫސް ވަނީ ދެއްވާފައެވެ.
ވާޗުއަލް ބްރީފިންގްގައި ވާހަކަ ދައްކަވަމުން ޑރ ޓެޑްރޯޒް ވިދާޅުވީ މިހާރު ތަޖުރިބާ ކުރަމުންދާ ކަންތައްތައް ނިމުމަކަށް އައިސް، އާންމު ދިރިއުޅުމައިގެން ކުރިއަށް ދިއުމަށް އެންމެންވެސް ބޭނުންވާ ކަމަށާ، ނަމަވެސް ގަބޫލުކުރަން ދަތި ހަގީގަތަކީ، މިކަން އަދި ނިމެން ގާތްވެސް ނުވާ ކަންކަމަށެވެ.
ބައެއް ގައުމުތަކުން ހިސާބެއްގެ ކުރިއެރުމެއް ހޯދި ކަމުގައި ވީ ނަމަވެސް މުޅި ދުނިޔޭގައި ބަލިމަޑުކަން ފެތުރެމުންދާ ދުވެލި ދަނީ ހަލުވި ވަމުން ކަން ޑރ ޓެޑްރޯޒް ވަނީ ފާހަގަކުރައްވާފައެވެ.
ޕޮޒިޓިވްވި މީހުންގެ އަދަދު 10 މިލިއަނަށްވުރެ މައްޗަށް އަރާ، މަރުވި މީހުންގެ އަދަދު ބައި މިލިއަނަށްވުރެ މައްޗަށް އަރާފައިވާއިރު، ގައުމީ އެއްބައިވަންތަކަމާ، ބައިނަލްއަގުވާމީ އެއްބައެއްވަންތަކަން ނެތި ބައިބައިވެގެން އުޅުމަކީ ވައިރަސް ފެތުރިގެންދާ ސްޕީޑް ހަލުވިވެގެންދާ ސަބަބުކަމަށާ، މި ކާރިސާގެ އެންމެ ގޯސް ހިސާބު އަދި އޮތީ އަންނަން ކަމަށްވެސް ޑރ ޓެޑްރޯޒް ވަނީ ވިދާޅުވެފައެވެ.
ޑރ ޓެޑްރޯޒް ވަނީ ދެކުނު ކޮރެއާ، ޖަރުމަނުވިލާތް އަދި ޖަޕާނުން އިބުރަތް ހާސިލު ކުރުމަށް ގައުމުތަކުގެ ސަރުކާރުތަކަށް ގޮވާލައްވާފައެވެ.
ކޮވިޑް-19ގެ ބަލިމަޑުކަމާއެކު މުޅި ދުނިޔެ ހުއްޓުމަކަށް އައިސްފައިވާއިރު، ބައެއް ގައުމުތަކުން ދަނީ ބަލިމަޑުކަމާއެކުވެސް ގައުމުގެ އެކި އޮޕަރޭޝަންތައް އަލުން ހިންގަން ފަށަމުންނެވެ. މިއާއެކު ދެވަނަ ރާޅެއްގެ ބިރުވެރިކަންވެސް ދަނީ އިންތިހާއަށް ބޮޑުވަމުންނެވެ. ނަމަވެސް އަދިވެސް، މި ބައްޔަށް ފަރުވާއެއް ހޯދިފައި ނެތްތާ، ވެކްސިނެއްވެސް ފެނިފައެއް ނުވެއެވެ.
