2019 ވަނަ އަހަރުގެ ފަހު ކޮޅު ޗައިނާއިން ފުރަތަމަ ފަހަރަށް ރިޕޯޓް ކުރި ކޮރޯނާވައިރަސް ޑިޒީޒް (ކޮވިޑް-19) އަށް ދުނިޔޭގެ އެކި ކަންކޮޅުތަކުން ޕޮޒިޓިވްވި މީހުންގެ އަދަދު 10 މިލިއަނަށްވުރެ މައްޗަށް އަރައިފިއެވެ.
ލިބިފައިވާ އެންމެ ފަހުގެ ތަފާސް ހިސާބުތަކަށް ބަލާއިރު ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު މިހާރު ވަނީ 10097323 އަށް އަރާފައެވެ. ވަކިވަކި ގައުމުތަކަށް ބަލާއިރު ކޮވިޑް-19ގެ ކޭސްތައް އެންމެ ގިނައިން ރިޕޯޓް ކުރަމުންދަނީ އެމެރިކާ، ބްރެޒިލް، ރަޝިއާ އަދި އިންޑިއާއިންނެވެ. އެމެރިކާއިން 2.5 މިލިއަނަށްވުރެ ގިނަ މީހުން ޕޮޒިޓިވްވެފައިވާއިރު، ބްރެޒިލްއިން 1.3 މިލިއަން މީހުން ވަނީ ޕޮޒިޓިވްވެފައެވެ. ރަޝިއާއިން 634437 މީހަކު ޕޮޒިޓިވްވެފައިވާއިރު އަވަށްޓެރި އިންޑިއާއިން ޕޮޒިޓިވްވި މީހުންގެ އަދަދު ވަނީ 529889 އަށް އަރާފައެވެ.
ކޮވިޑް-19ގެ އެކްޓިވް ކޭސްތަކުގެ ގޮތުގައި 4.1 މިލިއަނަށްވުރެ ގިނަ ކޭސް ރެކޯޑް ކޮށްފައިވާއިރު، މީގެ ތެރެއިން 99 ޕަސެންޓް މީހުންގެ ކިބައިން ބަލީގެ އަލާމާތްތައް ފެންނަމުންދަނީ ވަރަށް ކުޑަކޮށެވެ. ނަމަވެސް، 57823 މީހަކު މިވަގުތު އޮތީ ސީރިއަސް/ކުރިޓިކަލް ހާލުގައި ކަމަށް ޚަބަރު ލިބެއެވެ.
ކޮވިޑް-19ގެ ޝިކާރައަކާށްވެ، މަރުވި މީހުންގެ އަދަދު މިހާރު ވަނީ 5 ލައްކައިގެ ފާހަގަ ހުރަސް ކޮށްފައެވެ. މިހާތަނަށް ލިބިފައިވާ މައުލޫމާތަށް ބަލާއިރު 501585 މީހަކު ވަނީ މި ބަލީގައި މި ދުނިޔެ ދޫކޮށްފައެވެ.
ކޮވިޑް-19އަށް ކަނޑައެޅިގެން ވަކި ފަރުވާއެއް އަދި ހޯދިފައެއް ނުވެއެވެ. ބަލިޖެހޭ މީހުންނަށް ފަރުވާ ދެމުންދަނީ، ހަށިގަނޑުން ފެންނަ އަލާމާތްތަކަށް ބަލައިގެން ކަމަށްވާއިރު، މިހާތަނަށް 5.4 މިލިއަން މީހަކަށް ވަނީ ޝިފާ ލިބި، ބަލިން ރަނގަޅުވެފައެވެ.
