ވ ރަކީދޫ ބަނދަރުގެ މަޝްރޫއު ފަށާ، ރ. ވަންދޫ ބަނދަރު މަރާމާތު ކުރުމުގެ މަސައްކަތް ފަށަން އެމްޓީސީސީން ތައްޔާރުވެއްޖެއެވެ.
އެމްޓީސީސީ އިން ބުނީ ރ. ވަންދޫ ބަނދަރު ފުންކޮށް، މަރާމާތު ކުރުމަށް މަސައްކަތް ކުރުމަށް ބޭނުންވާ ސާމާނު މިހާރު އެރަށަށް ގެންގޮސް މޮބިލައިޒް ކޮށްފައިވާ ކަމަށެވެ. މި މަޝްރޫއުގެ ދަށުން މިހާރު އެރަށުގައި ޖަހާފައިވާ ސިމެންތި ގޯނީތައް ނަގައި ސާފުކޮށް، 1870 ކިޔުބިކް މީޓަރުގެ ސަރަހައްދެއް ފުންކޮށް 75 މީޓަރުގެ ސަރަހައްދެއްގައި ތޮށިލުމަށް ވަނީ ހަމަޖެހިފައެވެ.
2019، އޮގަސްޓް 26 ގައި ހަވާލުކުރި މި މަޝްރޫއަށް 5.99 މިލިއަން ރުފިޔާ ހޭދަވާނެ ކަމަށް އެމްޓީސީސީން ބުނެއެވެ.
އެމްޓީސީސީ އިން ބުނީ ވ. ރަކީދޫ ބަނދަރުގެ މަސައްކަތް ކުރުމަށް ބޭނުންވާ ސާމާނު މިހާރު އެރަށަށް ގެންގޮސް މޮބިލައިޒް ކޮށްފައިވާ ކަމަށެވެ. މި މަޝްރޫއުގެ އީއައިއޭ ރިޕޯޓަށް ހުއްދަ މިދިޔަ ޑިސެމްބަރު މަހު 26 ވަނަ ދުވަހު ލިބުނުއިރު، މަޝްރޫއު އެމްއެމްޓީސީސީއާ ހަވާލު ކުރީ 2019، އޮކްޓޯބަރު 1 ވަނަ ދުވަހު ކަމަށް އެމްޓީސީީސީން ބުނެއެވެ.
ރަކީދޫ ބަދަރު ޕްރޮޖެކްޓުގެ ދަށުން އެރަށުގެ ފަޅުން 5،645 ކިޔުބިކް މީޓަރުގެ ސަރަހައްދު ފުންކުރުމަށް ވަނީ ނިންމާފައެވެ. މި މަޝްރޫއުގެ ދަށުން އެ ރަށު ބަނދަރުގައި 156 މީޓަރުގެ ނެރެއް ކަނޑާ، 74 މީޓަރުގެ ރިވެޓްމެންޓު ޖަހާނެއެވެ. އަދި 164 މީޓަރުގެ ސަރަހައްދެއްގައި ތޮށިލާ، 429 އަކަމީޓަރުގެ ސަރަހައްދެއްގައި ޕޭވްމެންޓު ގާއިމް ކުރުމަށް ވަނީ ރާވާފައެވެ.
އެމްޓީސީސީން ބުނީ، މި މަޝްރޫއަށް 18.5 މިލިއަން ރުފިޔާ ހޭދަވާނެ ކަމަށާއި، ބަނދަރުގެ މަސައްކަތް އަންނަ އޮކްޓޯބަރު މަހުގެ ފަސްވަނަ ދުވަހަށް ނިންމާލެވޭނެ ކަމަށް ލަފާ ކުރެވޭ ކަމަށެވެ.
