ހއ. އުލިގަމުން ކޮވިޑަށް ފުރަތަމަ ޕޮޒިޓިވްވި މީހާ ބަލިން ރަނގަޅުވެ، ނަތީޖާ ނެގެޓިވް ވެފައިވާ ކަމަށް ހޯރަފުށި ދާއިރާގެ މެންބަރު އަހުމަދު ސަލީމް ވިދާޅުވެއްޖެއެވެ.
ސަލީމް މިއަދު ހަވީރު ކުރެއްވި ޓްވީޓެއްގައި ވިދަޅުވީ އުލިގަމުން ކޮވިޑް-19 އަށް ފުރަތަމަ ޕޮޒިޓިވްވި ފާރާތް ބަލި ރަނގަޅު ވެފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށެވެ.
ނަމަވެސް އެކަން އެޗްޕީއޭއިން އަދި އުލާނެއް ނުކުރެއެވެ.
އަދި ރާއްޖެ މި ބަލިމަޑުކަމުން ސަލާމަތް ކުރައްވާ އުފާވެރި ދުވަސްތަކެއް ދިވެހިންނާ ބައްދަލު ކުރާނެ ކަމުގެ އުންމީދު ކުރައްވާ ކަމަށްވެސް ސަލީމް ވިދާޅުވެއެވެ. އިތުރު މީހަކު ބަލިން ރަނގޅުވެފައިވާ ކަމަށް ސަލީމް ބުނެފައިވާއިރު ހެލްތް ޕްރޮޓެކްޝަން އެޖްނެސީ (އެޗްޕީއޭ) އިން އަދި އިތުރު މީހަކު ރަނ ގަޅުވެފައިވާ ކަމެއް އިއުލާނެއް ނުކުރެއެވެ.
އުލިގަމުން ފުރަތަމަ ކޭސްއެއް ފެނި ޓެސްޓްކުރި މީހާ ކޮވިޑް19 އަށް ޕޮޒިޓިވް ވިކަން ސަރުކާރުން އިއުލާން ކޮށްފައި ވަނީ މިދިޔަ އޭޕްރީމް މަހުގެ 19 ވަނަ ދުވަހެވެ. އެއީ މީހުން ދިރިއުޅޭ ރަށަކުން ކޮވިޑަށް ޕޮޒިޓިވް ވި ފުރަތަމަ ކޭސް ފެނުން ރަށްވެސްމެއެވެ.
ރާއްޖޭގައި ޕޮޒިޓިވް ވި މީހުންގެ ޖުމްލަ އަދަދު ވަނީ 897 އަށް އަރާފައެވެ. އޭގެ ތެރޭގައި ހިމެނެނީ 302 ދިވެހިންނާއި 595 ބިދޭސީންނެވެ.
މިހާތަނަށް އައި އިރު ރާއްޖެއިން މި ބަލި ޖެހިގެން ތިން މީހަކު ވަނީ މަރުވެފައެވެ. އޭގެތެރޭގައި ހިމެނެނީ 83 އަހަރުގެ ދިވެހި އަންހެނަކާއި 33 އަހަރުގެ ބަންގްލަދޭޝް ފިރިހެނަކާއި 80 އަހަރުގެ ދިވެހި ފިރިހެނެކެވެ.
އަދި މީގެ އިތުރުން މި ބަލި ޖެހުނު މީހުންގެ ތެރެއިން 31 މީހަކު މިހާރު ރަނގަޅުވެފައި ވާ ކަމަށް ސަރުކާރުން ވަނީ އިއުލާން ކޮށްފައެވެ.
އުލިގަމުން ކިތައް މީހުން ފައްސިވިބާ؟