ވ. އަތޮޅު ޖުޑީޝަލް ދާއިރާން ހިންގަން އެ އަތޮޅު ފުލިދޫ ދާއިރާގެ މެޖިސްޓްރޭޓް އަހުމަދު ޝަރީފަށް ހަވާލުކުރަން ޖޭއެސްސީން ނިންމައިފިއެވެ.
މިގޮތަށް ނިންމާފައިވަނީ ޖޭއެސްސީން އިއްޔެ ބޭއްވި އެ ކޮމިޝަންގެ 31 ވަނަ ބައްދަލުވުމުގައެވެ.
ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނީ، ވ. އަތޮޅު ޖުޑީޝަލް ދާއިރާ ހިންގުމާ ހަވާލުވެ ހުންނެވި މެޖިސްޓްރޭޓް މަގާމުން މުސްކުޅި ކޮށްދެއްވުމަށް އެދިވަޑައިގެންފައި ވާތީ ވ. އަތޮޅު ޖުޑީޝަލް ދާއިރާން ހިންގަން އެ އަތޮޅު ފުލިދޫ ދާއިރާގެ މެޖިސްޓްރޭޓް އަހުމަދު ޝަރީފަށް ހަވާލުކުރަން ނިންމާފައިވާ ކަމަށެވެ.
ޖޭއެސްސީން އިއްޔެ ބޭއްވި ބައްދަލުވުން ކުރިއަށް ގެންގޮސްފައިވަނީ އޯޑިއޯ ވީޑިއޯ ކޮންފަރެންސް އަދި މައިކްރޯސޮފްޓް ޓީމްސް މެދުވެރިކޮށް ކަަމަށް ޖޭއެސްސީން ބުނެއެވެ. އަދި މި ބައްދަލުވުމުގައި އެ ކޮމިޝަންގެ 8 މެންބަރުން ބައިވެރިވެފައިވާ ކަމަށް ވެސް ޖޭއެސްސީން ބުނެއެވެ.
ކުރިން ވ. އަތޮޅު ޖުޑީޝަލް ދާއިރާން ހިންގަން ހަވާލުވެވަޑާއިގެން ހުންނެވީ ވ. ކެޔޮދޫ މެޖިސްޓްރޭޓްގެ އިސް މެޖިސްޓްރޭޓް އަންދުލް ޣަފޫރު މުހައްމަދެވެ.
