އާ ކޭހެއް ނުފެންނަ ކަމަށް ރިޕޯޓްކުރިތާ 1 ދުވަސް ފަހުން، ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވާ މީހުންގެ އަދަދު އިތުރުވަމުން އަންނަ ކަމުގެ އިންޒާރު ދެނެވި މެސެޖެއް ޗައިނާއިން އާންމުކޮށްފިއެވެ.
ޗައިނާއިން ބުނާ ގޮތުގައި އެގައުމުގައި ކޮވިޑް-19ގެ ކޭސްތައް އިތުރުވަމުންދިއުމުގައި، ބޭރު ގައުމުތަކުން އަންނަ މީހުންގެ ހިއްސާ ބޮޑެވެ.
ކޮވިޑް-19 ގެ ފުރަތަމަ ކޭސް ރިޕޯޓްކޮށްފައިވަނީ ޗައިނާގައި ގަވައިދާ ހިލާފަށް ވަލުޖަނަވާރުގެ ވިޔަފާރި ކުރަމުންދިޔަ ވޫހާންގެ ސީފުޑް މާކެޓަކުން، މިދިޔަ އަހަރުގެ ފަހުކޮޅުގައެވެ.
ކޮވިޑް-19ގެ ބަލިމަޑުކަމާއެކު ވޫހާން ސިޓީ އެކީ އެކައްޗަކަށް ލޮކްޑައުން ކޮށްފައި އޮތުމަށްފަހު، އެ ސިޓީގެ ބޯޑަރު ހުޅުވާފައިވަނީ މިމަހުގެ 8 ވަނަ ދުވަހުއެވެ.
ބޭރުފުށުން ބަލީގެ އަލާމާތްތައް ނުފެނު ކަމުގައި ވީނަމަވެސް ވައިރަހުގެ އަސަރުކޮށްފައިވާ މީހުން އުޅޭ ކަމަށާ، އެމީހުންނަކީ އެހެން މީހުންނަށްވެސް ބަލި ފަތުރާ ބައެއްކަމަށްވާއިރު، ކޮވިޑް-19ގެ ދެވަނަ ރާޅެއް ޗައިނާއަށް އަރާފާނެ ކަމުގެ ބިރު އެބައޮތްކަމަށް ޗައިނާގެ ކަމާބެހޭ ފަރާތްތަކުން ދަނީ ބުނަމުންނެވެ.
ޗައިނާގެ އެންމެ ފަހުގެ ރެކޯޑްތަކަށް ބަލާއިރު މިއަދު 46 ކޭހެއް މުޅިން އަލަށް ރިޕޯޓްކޮށްފައިވާއިރު އެގައުމުން ޕޮޒިޓިވްވި މީހުންގެ ޖުމުލަ އަދަދު 81953 އަށް އަރައެވެ. މި ބަލީގައި މިއަދު ޗައިނާއިން މަރުވިކަމަށް ރެކޯޑްކޮށްފައިވަނީ 3 ކޭހެކެވެ. މިއާއެކު ޗައިނާއިން ކޮވިޑް-19ގައި މަރުވި މީހުންގެ ޖުމުލަ އަދަދު މިވަނީ 3339 އަށް އަރާފައެވެ. ޗައިނާގައި ކޮވިޑް-19އަށް ޕޮޒިޓިވްވެފައިވާ މީހުންގެ ތެރެއިން އެކްޓިވް ކޭހުގެ ގޮތުގައި ރެކޯޑްކޮށްފައިވަނީ 1089 ކޭހެކެވެ. މީގެ ތެރެއިން 141 މީހެއްގެ ހާލު ސީރިއަސް/ކުރިޓިކަލް ކަމަށް މައުލޫމާތު ލިބެއެވެ.
