ސްކޫލުތަކުގައި ތިބި ކައުންސިލަރުންގެ ކެޕޭސިޓީ އިތުރު ކުރަން ނިންމައިފިއެވެ.
ކޮވިޑް-19ގެ އެންމެފަހުގެ މައުލޫމާތު ހިއްސާ ކުރުމަށް މިހާރު ދަރުބާރުގޭގައި ކުރިއަށް ދާ ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވީ، ސްކޫލުތަކުގައި ތިބި ކައުންސިލަރުންގެ ކެޕޭސިޓީ އިތުރު ކުރަން ނިންމާފައިވާ ކަމަށެވެ. އަދި މި ފިޔަވަޅު އެޅުމަށް ނިންމާފައި ވަނީ ކޮވިޑް-19ގެ ސަބަބުން ދަރިވަރުންނާއި، ބެލެނިވެރިން އަދި ސްކޫލުގެ މުވައްޒަފުންނަށް ނަފްސާނީ ގޮތުން ބޮޑެތި އަސަރުތަކެއް ކުރަމުން ދާތީ ކަމަށެވެ.
އެޑިއުކޭޝަން މިނިސްޓަރު ވިދާޅުވީ، ކޮވިޑް-19ގެ ކުރިން ސްކޫލުތަކުގައި ތިބި ކައުންސިލަރުން މަސައްކަތް ކުރި ގޮތާއި ކުރިއަށް އޮތްތަނުގައި ސްކޫލު ހުޅުވުމުން މަސައްކަތް ކުރާނެ ގޮތް ތަފާތުވާނެ ކަމަށެވެ. އަދި އެކަމަށް ތައްޔާރު ވުމަށްޓަކައި، ކައުންސިލަރުންނަށް ޓްރެއިނިން ތަކެއް ދިނުމުގެ މަސައްކަތްވެސް ކުރިއަށްދާ ކަމަށް މިނިސްޓަރު ވިދާޅުވިއެވެ.
މީގެ އިތުރުން އެޑިއުކޭޝަން މިނިސްޓާރު ވިދާޅުވީ، އެ މިނިސްޓްރީގެ މުވައްޒަފުންތަކެއް ފްރޮންޓްލައިންގައި މަސައްކަތް ކުރަމުން ދާ ކަމަށެވެ. އެގޮތުން، މާލެ އޭރިއާގެ ސްކޫލުތަކުގެ ހުރިހާ ހެލްތް އެސިސްޓަންޓުންނާއި، ކައުންސިލަރުން ދަނީ ނެޝަނަލް އެމަޖެންސީ އޮޕަރޭޝަން ސެންޓާ (އެންއީއޯސީ) ގައި މަސައްކަތް ކުރަމުންދާ ކަން މިނިސްޓާރު ފާހަގަ ކުރެއްވިއެވެ.
ތައުލީމުދޭ ހުރިހާ ތަނެއް ވަގުތީ ގޮތުން 1 ހަފްތާއަށް ލަސް ކުރުމަށް ސަރުކާރުން ނިންމާފައި ވަނީ މިދިޔަ މިޑްޓާމް ބްރޭކްގައެވެ. ސަރުކާރުން ވަނީ މިއަދު މި ފިޔަވަޅު ފަސްވަނަ ފަހަރަށް އަޅާފައެވެ. މިދިޔަ މާޗް މަހު 5 ވަނަ ދުވަހުން މިޑް ޓާމް ބްރޭކަށް ސްކޫލްތައް ބަންދުވިގޮތަށް އަދި ނުހުޅުވައެވެ.
