ކޮވިޑް-19ގެ ނުރައްކާ އިންތިހާއަށް ބޮޑުވަމުންދާ ސްޕެއިންއިން މި ބަލިޖެހިގެން މަރުވި މީހުންގެ އަދަދު 3434އަށް އަރާފައިވާކަމަށް އެގައުމުގެ ސިއްހަތާ ބެހޭ ވުޒާރާއިން ހާމަކޮށްފިއެވެ.
މިއީ އަންގާރަ ދުވަހު މަރުވި މީހުންނަށްވުރެ 27 ޕަސެންޓް އިތުރު އަދަދެކެވެ. މިއާއެކު ކޮވިޑް-19ގެ ޝިކާރައަކަށްވެގެން ސްޕެއިން މަރުވި މީހުންގެ އަދަދު މިވަނީ، މިބަލީގެ ކޭސްތައް ފުރަތަމަ ފެންނަން ފެށި ޗައިނާއިން މަރުވި މީހުންގެ އަދަދަށްވުރެ މައްޗަށް އަރާފައެވެ.
ޗައިނާގެ ނޭޝަނަލް ހެލްތް ކޮމިޝަނުން މައުލޫމާތު ދޭ ގޮތުގައި ކޮވިޑް-19ގެ ޖެހިގެން އެގައުމުން މަރުވި މީހުންގެ އަދަދަކީ 3281އެވެ.
ސްޕެއިންގެ އެންމެ ފަހުގެ ތަފާސް ހިސާބުތަކަށް ބަލާއިރު އެގައުމުން މި ވައިރަހަށް ޕޮޒިޓިވްވި މީހުންގެ އަދަދު މިހާރު ވަނީ 47610އަށް އަރާފައެވެ. ސްޕެއިންގެ ސިއްހަތާ ބހޭ އޮފިޝަލެއް ކަމަށްވާ ފެރްނާޑޯ ސިމޯން ވިދާޅުވީ ކުރިއަށް އޮތް ދުވަސްތަކުގައި އެގައުމުން ކޮވިޑް-19އަށް ޕޮޒިޓިވްވާ މީހުންގެ އަދަދު އިތުރުވުން އެކަށީގެންވާކަމަށް ގަބޫލުކުރެވޭ ކަމަށެވެ.
