ހަންޓާވައިރަސްގެ ޝިކާރައަކަށްވެ، ޗައިނާއިން މީހަކު މަރުވެފައި ވާކަމަށް އެގައުމުގެ މީޑިއާއާއި ހަވާލާދީ ބައިނަލްއަގުވާމީ މީޑިއާއިން ރިޕޯޓްކޮށްފިއެވެ.
ހަންޓާވައިރަސްއަކީ ރޯޑަންޓްސް ނުވަތަ ހިކަނދި/މީދާ ޒާތުގެ ޖަނަވާރުތަކުން އިންސާނުންގެ ގަޔަށް ވާރުތަކުރާ، އެ ވައިރަސް ޖެހުމުން އެ ޖެހޭ މީހަކު އިންފެކްޓްވާ ނުރައްކާތެރި ވައިރަހެކެވެ.
މިހާދިސާ ހިނގާފައިވަނީ ޔުނާން ޕްރޮވިންސްގައި ކަމަށް މައުލޫމާތު ލިބެއެވެ.
މަރުވެފައިވަނީ ޗާޓަރު ބަހެއްގައި ދަތުރުކުރަމުންދިޔަ ފިރިހެނެއް ކަމަށާ، އޭނާއާއި އެއްބަހަކުން ދަތުރުކުރި މީހުންވެސް މި ވައިރަހަށް ޓެސްޓުކޮށްފައިވާކަމަށް މައުލޫމާތު ލިބެއެވެ. ނަމަވެސް އެހެން މީހުންގެ ޓެސްޓުތަކުގެ ނަތީޖާ އާންމުކޮށްފައެއް ނުވެއެވެ.
ހަންޓާވައިރަސް އެންމެ ފުރަތަމަ ފެނިފައިވަނީ 1993 ވަނަ އަހަރު އެމެރިކާއިންނެވެ. ސީދާ މި ވައިރަހަކީ އެކެއްގެ ގައިން އަނެކެއްގެ ގަޔަށް ވާރުތަކުރާ ވައިރަހަކަށް ނުވިނަމަވެސް، ހަންޓާވައިރަހުގެ ބާވަތެއް އެކެއްގެ ގައިން އަނެކެއްގެ ގަޔަށް ވާރުތަކުރާ ކަމަށް 1996 ވަނަ އަހަރު އާޖެންޓީނާއިންވަނީ ފާހަގަކުރެވިފައެވެ.
ޗައިނާއިން ހަންޓާވައިރަސް ފެނި، އެ ވައިރަހުގެ އަސަރުކުރި މީހެއްގެ ފުރާނަ ގެއްލިފައިވާ މި ދަނޑިވަޅަކީ، މިދިޔަ އަހަރުގެ ފަހުކޮޅު ޗައިނާއިން ފުރަތަމަ ފަހަރަށް ފެނުނު ކޮރޯނާވައިރަސް ޑިޒީޒް (ކޮވިޑް-19)ގެ ބިރުވެރިކަމުގައި މުޅި ދުނިޔެ ޖެހިފައިވާ ދަނޑިވަޅެކެވެ.
މިއީ ވަރަށް ކުރީސްސުރެ އުޅޭ ވައިރަހެއް .. ތިޔަ ބޭފުޅުންވެސް އެ ކަން ބައްލަވާ ލައްވާތި ..