6 ދުވަހުގެ މެދުކެނޑުމަކަށް ފަހު، ޗައިނާގެ ހޫބޭ ޕްރޮވިންސްއިން ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވް ކޭހެއް ފެނިފައިވާކަމަށް ޗައިނާގެ ގައުމީ ސިއްހަތާ ބެހޭ ކޮމިޝަނު (އެން.އެޗް.ސީ) ހާމަކޮށްފިއެވެ.
ހޯމަ ދުވަހު މުޅި ޗައިނާއިން ކޮވިޑް-19އަށް ޕޮޒިޓިވްވެގެން 78 ކޭހެއް ރިޕޯޓްކޮށްފައިވާއިރު، މީގެ ތެރެއިން 74 ކޭހަކީ ބޭރު ގައުމުތަކުން ޗައިނާއަށް އިމްޕޯޓްވި ކޭސްތަކެވެ. މިއާއެކު ޗައިނާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު 81171 އަށް އަރައެވެ. މީގެ ތެރެއިން 73159 މީހަކަށް ފަރުވާ ދިނުމަށްފަހު ހޮސްޕިޓަލުތަކުން ދޫކޮށްލާފައިވާކަމަށް އެން.އެޗް.ސީއިން މައުލޫމާތު ދެއެވެ.
ހޫބޭއިން އަލަށް ފެނުނު ކޭހާ ބެހޭ މާ ބޮޑު ތަފްސީލެއް އަދި ނުލިބެއެވެ. ނަމަވެސް މިއީ ސަމާލުކަންދޭންޖެހޭ ކަމެކެވެ. ކޭހެއް ޕޮޒިޓިވް ނުވެ ދުވަސްތަކެއް ވުމަށްފަހު، އަނެއްކާވެސް ބަލި ފެންނަން ފަށާފާނެކަމުގެ އިންޒާރު، މި ކޭހުން ވަނީ ދީފައެވެ.
ކޮވިޑް-19ގެ ޝިކާރައަކަށްވެ ހޯމަ ދުވަހުން އެގައުމުން 7 މީހެއްގެ ފުރާނަ ގެއްލިފައިވާއިރު މި ބަލިމަޑުކަމުގައި ޗައިނާއިން މަރުވި މީހުންގެ ޖުމުލަ އަދަދު 3277އަށް އަރައެވެ. މީގެ ތެރެއިން އެންމެ ގިނަ މީހުން މަރުވެފައިވަނީ ކޮވިޑް-19ގެ ގްރައުންޑް ޒީރޯ ކަމުގައި ބަލާ ހޫބޭއިންނެވެ. ހޫބޭއިން މަރުވި މީހުންގެ ޖުމުލަ އަދަދު 3160 އަށް އަރައެވެ.
ފާއިތުވީ ހަފުތާތަކަށް ބަލާއިރު ޗައިނާގައި ދިރިއުޅެމުންދާ ފަރާތްތަކުގެ މެދުގައި، އެކެއްގެ ގައިން އަނެކެއްގެ ގަޔަށް ބަލި ފެތުރެމުންދިޔަ ނިސްބަތްވަނީ ވަރަށް ބޮޑަށް ދަށަށް ގޮސްފައެވެ. މުޅިންހެންވެސް އަލަށް ރިޕޯޓްކޮށްފައިވަނީ އެގައުމަށް އިމްޕޯޓްވި ކޭސްތަކެވެ. ޗައިނާއަށް އިމްޕޯޓްވި ކޮވިޑް-19ގެ ކޭސްތަކުގެ އަދަދު 427އަށް އަރައެވެ.
