މުޅި ދުނިޔެ ސިއްސުވާލި ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް އެންމެ ފުރަތަމަ ފެންނަން ފެށި ޗައިނާގެ ހޫބޭ ޕްރޮވިންސްއިން މި ރޯގާއަށް އިތުރު މީހަކު ޕޮޒިޓިވްނުވާތާ ވިދިވިދިގެން 5 ދުވަސް ފާއިތުވެފައިވާކަމަށް ރެކޯޑްތަކުން ދައްކައިފިއެވެ.
ޗައިނާގެ ގައުމީ ސިއްހަތާ ބެހޭ ކޮމިޝަން (އެޗް.އެޗް.ސީ)އިން އާންމުކޮށްފައިވާ އެންމެ ފަހުގެ ތަފާސް ހިސާބުތަކަށް ބަލާއިރު އާދީއްތަ ދުވަސް ނިމުނުއިރު އެގައުމުން ކޮވިޑް-19އަށް ޕޮޒިޓިވްވީ 39 މީހެކެވެ. އަދި މަރުވީ 9 މީހުންނެވެ.
އަލަށް ފެނުނު ކޭސްތަކުގެ ތެރެއިން އެއްވެސް ކޭހަކީ ހޫބޭއިން ރިޕޯޓްކުރި ކޭހެއް ނޫނެވެ.
ޗައިނާއިން މިހާރު ފެންނަމުންދާ ކޮވިޑް-19ގެ އާ ކޭސްތަކަކީ މުޅިންވެސް އެގައުމަށް އިމްޕޯޓްވެފައިވާ ނުވަތަ ބޭރު ގައުމުތަކުން އެގައުމަށް ދަތުރުކުރި މީހުންގެ ފަރާތުން ފެންނަ ކޭސްތަކެވެ. މިގޮތަށް ޖަޕާނަށް އިމްޕޯޓްވެފައިވާ ކޮވިޑް-19ގެ ކޭސްތަކުގެ އަދަދު މިހާރު ވަނީ 353އަށް އަރާފައެވެ.
އެން.އެޗް.ސީގެ ރެކޯޑްތަކަށް ބަލާއިރު ކޮވިޑް-19ގެ ޝިކާރައަކަށްވެ، ޗައިނާއިން މަރުވި މީހުންގެ ޖުމުލަ އަދަދު 3270 އަށް އަރާފައިވާއިރު، މީގެ ތެރެއިން 3153 މީހުންނަކީ ހޫބޭ ޕްރޮވިންސްއިން މަރުވި މީހުންނެވެ. ޗައިނާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު 81093 އަށް އަރައެވެ.
އެން.އެޗް.ސީއިން ބުނީ 72703 ޕޭޝަންޓުންގެ ބަލި މިހާރު ފަސޭހަވެފައިވާކަމަށާ، އެމީހުން މިހާރު ހޮސްޕިޓަލުތަކުންވެސް ދޫކޮށްލާފައިވާކަމަށެވެ. ކަންމިހެން އޮތް ނަމަވެސް، ކޮވިޑް-19އަކީ އެއް ފަހަރު ޖެހި، ރަނގަޅުވުމަށްފަހު އަނެއްކާވެސް އެ ބަލި ޖެހުމުގެ ފުރުސަތު އޮންނަ ރޯގާއެކެވެ.
މިހާތަނަށް ފަރުވާއެއް އަދި ވެކްސިންއެއްވެސް ހޯދިފައި ނުވާ ކޮވިޑް-19ގެ ކޭސްތައް އެންމެ ފުރަތަމަ ހޫބޭ ޕްރޮވިންސްއިން ފެންނަން ފެށީ، އެ ޕްރޮވިންސްގެ ސިޓީއެއް ކަމަށްވާ ވޫހާންގައި ގަވައިދާ ހިލާފަށް ވަލުޖަނަވާރުގެ ވިޔަފާރި ކުރަމުންދިޔަ ސީފުޑް މާކެޓެއް ހިމެނޭ ސަރަހައްދުން، މިދިޔަ 2019 ވަނަ އަހަރުގެ ފަހުކޮޅުއެވެ. އޭގެ ފަހުން އަދާ ޖެހުނުއިރުވެސް، ވައިރަހުގެ ހަގީގަތެއްވެސް ހޯދިފައި ނުވާއިރު، އިންސާނުންގެ ހަށިގަނޑަށް އެ ވައިރަސް އެރީ ކިހިނެއްކަންވެސް ކަށަވަރުކޮށް ދެނެގަނެވިފައެއް ނުވެއެވެ.
