ފަނޑިޔާރަކު އަމިއްލައަށް އެދިގެން ރިޓަޔާވާން އެދޭއިރު އެ ފަނޑިޔާރެއްގެ ސުލޫކީ މައްސަލައެއް ބަލަމުންދާނަމަ ރިޓަޔާވިޔަސް އެ ބޭފުޅުންނަށް އިނާޔަތްތައް ނުދޭ ގޮތަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ހަމަޖައްސައިފިއެވެ.
އުމުރުން 55 އަހަރުވުމުން އަމިއްލައަށް އެދިގެން ނުވަތަ ސިއްހީ ސަބަބުތަކަށްޓަކައި މަގާމުން ރިޓަޔާ ކުރާ ފަނޑިޔާރުންނަށް އިނާޔަތް ދިނުމުގެ ގަވާއިދުގައި ކުރިން އޮންނަނީ ފަނޑިޔާރުންގެ ގާނޫނުގެ ދަށުން އަމިއްލައަށް އެދިގެން ނުވަތަ ސިއްްހީ ސަބަބުތަކަށްޓަކައި ޖޭއެސްސީން ރިޓަޔާ ކުރަން ނިންމާ ބޭފުޅުންނަށް އިނާޔަތްތައް ހަމަޖައްސައި ދޭ ގޮތަށެވެ.
ޖޭއެސްސީން ވަނީ މި ގަވާއިދަށް އިސްލާހެއް ގެނެސްފައެވެ. އެގޮތުން ރިޓަޔާ ކުރައްވަން އެދިވަޑައިގަންނަވާ ފަނޑިޔާރެއްގެ ސުލޫކީ މައްސަލައެއް ޖޭއެސްސީން ބަލަމުންދާ ނަމަ ނުވަތަ އެފަދަ މައްސަލައެއް އެ ކޮމިޝަނަށް ހުށަހެޅިފައިވާ ނަމަ، އެ ފަނޑިޔާރަކަށް އިނާޔަތް ހަމަޖައްސައެއް ނުދެވޭނެ ގޮތަށް މިހާރު ވަނީ އިސްލާހު ގެނެސްފައެވެ.
ނަމަވެސް ފަނޑިޔާރަކު އަމިއްލައަށް އެދިވަޑައިގެން ރިޓަޔާ ކުރައްވާ އިރު އެފަދަ މައްސަލަ އެއް ނެތް ފަރާތްތަކަށް ކުރިންވެސް އޮންނަ އުސޫލުގެ މަތިން މާލީ އިނާޔަތްތަކާއި ލިވިން އެލަވަންސާއި މެޑިކަލް އިންޝުއަރެންސްގެ އިތުރުން ސެކިއުރިޓީ ހަމަޖައްސައި ދޭނެއެވެ.
