ފުޓްބޯޅަ ކުޅެން އުޅުނު ބިދޭސީއަކު މަރުވެއްޖެއެވެ.
މިކަމާ ގުޅިގެން ފުލުހުން ބުނީ، މިއަދު 8:20 ހާއިރު ފުލުހުން ހުޅުމާލޭގައި ޕެޓްރޯލް ކުރަމުން ދަނިކޮށް ހުޅުމާލޭ ޕެޓްރޯލް ޓާފް ދަނޑު އެކަކުން ބަޔަކު މީހަކު އަތްދަނޑިމައްޗަށް ލައިންގެން އަންނަތަން ފެނިފައިވާ ކަމަށެވެ. އަދި މި މަންޒަރު ފެނުމުން ފުލުހުން ވަނީ އެތަނަށް ގޮސް ވެގެން އުޅޭ ގޮތް ބަލާފައި ކަމަށް ފުލުހުން ބުނެއެވެ.
ފުލުހުން ބުނީ، ޓާފް ދަނޑު އެކަކަށް ގޮސް ބެލިބެލުމުން، މީހަކު ފުޓްބޯޅަ ކުޅެން އުޅެނިކޮށް ވެއްޓިގެން އުޅޭ ކަމަށް މައުލޫމާތު ލިބިފައިވާ ކަމަށެވެ. އަދި މައުލޫމާތު ލިބުމާއެކު ފުލުހުން ވަނީ ފުލުހުންގެ ވެހިކަލްގައި އޭނާ ހުޅުމާލެ ހޮސްޕިޓަލަށް ގެންގޮސްދީފައިވާ ކަމަށް ފުލުހުން ބުނެއެވެ.
ވެއްޓުނު މީހާ ހުޅުމާލޭ ހޮސްޕިޓަލަށް ގެންދިޔައިރުވެސް، މަރުވެފައިވާ ކަމަށް ޑޮކްޓަރުންނާ ހަވާލާދީ ފުލުހުން ބުނެއެވެ. ފުލުހުން ބުނީ، މަރުވެފައިވަނީ އުމުރުން 30 އަހަރުގެ ބަންގްލަދޭޝް ފިރިހެނެއް ކަމަށެެވެ.
ފުލުހުން ބުނީ މި ހާދިސާއާ ގުޅިގެން ފުލުހުން ބަލަންޖެހޭ ކަންކަން ބަލަމުންދާ ކަމަށެވެ.
