28 މީހުންނާއެކު ދަތުރުކުރި ލޯންޗެއް ފަރަށް އަރައިގެން އެމްއެންޑީއެފުން ހަރަކާތްތެރިވާން ފަށައިފިއެވެ.
މި ހާދިސާއާ ގުޅިގެން އެމްއެންޑީއެފުން ބުނީ 28 މީހުންނާއެކު އއ. މަޔާފުށި ރިސޯޓުން ފުރައިގެން ހުޅުލެ ދަތުރުކުރި 'ސުވެނިރް 19' ލޯންޗު މަޔާފުށި ރިސޯޓުގެ ނެރުމައްޗަށް މިއަދު ހެނދުނު 7:43 ހާއިރު އަރާފައިވާ ކަމަށެވެވެ. އަދި މި ހާދިސާއާ ގުޅިގެން އެހީތެރިކަން ފޯރުކޮށްދެމުންދާ ކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ މި ހާދިސާ ހިނގި އިރު ލޯންޗުގައި ތިބި މީހުން މިހާރު ވަނީ ރިސޯޓުގެ އެހެން ލޯންޗެއްގައިި ރިސޯޓަށް ގެންގޮސްފައި ކަމަށެވެ. މި ލޯންޗުގައި ތިބީ 25 ފަތުރުވެރިންނާއި، 3 ފަޅުވެރިން ކަމަށް އެމްއެންޑީއެފުން ބުނެއެވެ. ފަޅުވެރިންގެ ތެރޭގައި ތިބީ ދެ ދިވެހިންނާއި ބިދޭސީއެކެވެ.
އެމްއެންޑީއެފުން ބުނީ މިހާރު މި ލޯންޗު ފުންކޮށްފައިިވާ ކަމަށާއި، ލޯންޗު ފުން ކޮށްފައި ވަނީ، ލޯންޗުގެ ވެރިފަރާތުން ހަމަޖެއްސި އުޅަނދެއްގެ އެހީގައި ކަމަށެވެ.
ރާއްޖޭގައި ހިނގާ މިފަދަ ހާދިސާތަކަށް އެމްއެންޑީއެފްގެ އެހީތެރިކަން މެދު ކެނޑުމެއް ނެތި ލިބެމުންދާކަން ފާހަގަކޮށްލެވެއެވެ.
