ޑިފެންސް މިނިސްޓަރު މާރިޔާ އަހްމަދު ދީދީ، އިންޑިއާއަށް ކުރެއްވި ދަތުރު ނިންމަވާލައްވައި، މިއަދު ހެނދުނު އެނބުރި ރާއްޖެ ވަޑައިގެންފިއެވެ.
އިންޑިއާ ސަރުކާރުގެ ދައުވަތަކަށް، މިމަހުގެ 3 އިން 8 އަށް ކުރެއްވި މި ދަތުރުގައި، މިނިސްޓަރު މާރިޔާ ވަނީ އިންޑިއާގެ މިނިސްޓާ އޮފް ޑިފެންސް ރާޖްނާތު ސިންގާ ބައްދަލުކުރައްވާފައެވެ. މި ބައްދަލުކުރެއްވުމުގައި، ދެބޭފުޅުންވަނީ ދިވެހިރާއްޖެއާއި އިންޑިއާ އާ ދެމެދު، ދިފާއީ އަދި އަސްކަރީ ރޮނގުން އޮތް ގާތް ގުޅުން އިތުރަށް ހަރުދަނާކުރެވޭނެ ގޮތްތަކާ ބެހޭގޮތުން މަޝްވަރާކުރައްވާފައެވެ. މިގޮތުން، ނުރައްކާތެރި ހާލަތްތަކުގައި ސަލާމަތީ ފިޔަވަޅެއްގެ ގޮތުން ބޭނުންކުރާ ޕްރޮޓެކްޓިވް ގިއާ، ދިވެހި ގައުމީ ދިފާއީ ބާރުގެ ސިފައިންނަށް އިންޑިއާއިން ފޯރުވައިދިނުމާ ބެހޭގޮތުން ދެބޭފުޅުންވަނީ މަޝްވަރާކުރައްވާފައެވެ.
އަދި ނޮވެލް ކޮރޯނާ ވައިރަސް ފެތުރެމުންދާ ޗައިނާގެ ވޫހާންގައި ތިބި ދިވެހިން އިވެކުއޭޓް ކުރުމުގައި އިންޑިއާ ސަރުކާރުން ވެދެއްވި އެހީތެރިކަމަށްޓަކައި، އެގައުމުގެ ސަރުކާރަށް މާރިޔާ ވަނީ ޝުކުރު އަދާކުރައްވާފައެވެ. އިންޑިއާއިން ކުރި ޓެސްޓުތަކުން ހާމަވާގޮތުގައި، މިހާތަނަށް ކޮރޯނާ ވައިރަސްއަށް އެއްވެސް ދިވެއްސަކު ޕޮޒިޓިވް ވެފައެއް ނުވެއެވެ. މި ދަތުރުފުޅުގައި، މިނިސްޓާ މާރިޔާ ވަނީ އިންޑިއާ އަސްކަރިއްޔާގެ ޗީފް އޮފް ޑިފެންސް ސްޓާފް ޖެނެރަލް ބިޕިން ރާވަތާވެސް ބައްދަލުކުރައްވާފައެވެ. މިބައްދަލުކުރެއްވުމުގައި، ދެގައުމުގެ އަސްކަރީ ގުޅުން އިތުރަށް ބަދަހިކުރުމާ ބެހޭގޮތުން ދެބޭފުޅުންވަނީ މަޝްވަރާކުރައްވާފައެވެ.
މީގެ އިތުރުން، މާރިޔާ ވަނީ އިންޑިއާގެ އަސްކަރިއްޔާގެ މެޑިކަލް ކޯގެ އިސް ޖެނެރަލުންނާއި ޑޮކްޓަރުންނާ ބައްދަލުކުރައްވާ، ނޮވެލް ކޮރޯނާ ވައިރަސްއާ ގުޅިގެން ގާއިމްކުރާ އައިސޮލޭޝަން ސެންޓަރުންތައް ހިންގުމާ ބެހޭ ސްޓޭންޑަރޑް އޮޕަރޭޓިންގ ޕްރޮސީޖަރސް (އެސްއޯޕީސް) އާ ބެހޭގޮތުންނާއި، ކޮރޯނާ ވައިރަސްއަށް ޝައްކުކުރެވޭ މީހުން އިވެކުއޭޓް ކުރުމުގައި ހަރަކާތްތެރިވާ އެމްއެންޑީއެފްގެ ސިފައިންނަށް ޕްރޮޓެކްޓިވް ގިއާ ހޯދުމާ ބެހޭގޮތުންނާއި، ސެނަހިޔާ ހޮސްޕިޓަލަށް އެހީތެރިކަން ފޯރުވައިދިނުމާ ބެހޭގޮތުން މަޝްވަރާކުރައްވާފައެވެ.
މީގެ އިތުރުން، މާރިޔާ ވަނީ އިންޑިއާގެ ލަކްނައުގައި އޮތް ޑިފެންސް އެކްސްޕޯގައި ބައިވެރިވެވަޑައިގެންފައެވެ. އިންޑިއާގެ އެންމެ ފަހުގެ ދިފާއީ އަދި އަސްކަރީ އުފެއްދުންތައް އެއްތަނަކުން ފެންނަ މި އެކްސްޕޯގެ ސްޓޯލްތަކަށް އެކަމަނާ ވަނީ ޒިޔާރަތްކުރައްވާފައެވެ. މި ދަތުރުފުޅުގައި، އިންޑިއާގެ ތިން ޗެނަލަކަށް މިނިސްޓާ މާރިޔާވަނީ ބަސްދީގަތުމެއް ދެއްވާފައެވެ.
ދޫރުދަރްޝަން އިން ކުރި ސުވާލަކަށް ޖަވާބުދެއްވަމުން އެކަމަނާ ވިދާޅުވީ، ވޭތުވެދިޔަ އަހަރަކީ ދިފާއީ އަދި އަސްކަރީ ރޮނގުން ދެގައުމަށް ވަރަށް ކާމިޔާބު އަހަރެއް ކަމަށާއި، ދެގައުމުގެ އަސްކަރީ ގުޅުން އިތުރަށް ވަރުގަދަކުރުމުގައި ދެގައުމުގެ ވިސްނުން އެއްގޮތްކަމަށެވެ. ވިއޯން ނިއުސްއިން ކުރި ސުވާލަކަށް ޖަވާބު ދެއްވަމުން، މާރިޔާ ވަނީ، އެކަމަނާ އިންޑިއާއަށް ކުރެއްވި ދަތުރުފުޅަކީ ވަރަށް ކާމިޔާބު ދަތުރުފުޅެއް ކަމަށާއި، މިދިޔަ ޑިސެމްބަރުމަހު، އިންޑިއާއިން ރާއްޖެއަށް ހަދިޔާކުރި "ސީޖީއެސް ކާމިޔާބު" ފަދަ އިތުރު އުޅަނދެއް ހޯދުމަށް ރާއްޖެއިން ޝައުގުވެރިވާކަން އިންޑިއާ ސަރުކާރާ ހިއްސާކުރައްވާފައިވާނެ ކަމަށެވެ.
އަދި އިންޑިއާ ސަރުކާރުގެ ފަރާތުން އެކަމަށް "ޕޮޒިޓިވް ސިގްނަލެއް" ލިބިވަޑައިގެންފައިވާ ކަމަށް އެކަމަނާ ވިދާޅުވިއެވެ. ސްޓްރެޓްނިއުސް ގްލޯބަލްއިން ކުރި ސުވާލަކަށް ޖަވާބުދެއްވަމުން، މާރިޔާ ވިދާޅުވީ، ރާއްޖެއިން އެދެފި ކޮންމެ ކަމެއްގައި އެއްބާރުލުން ދޭން އިންޑިއާއިން އޮންނަނީ ތައްޔާރަށް ކަމަށާއި، ނިމިގެންދިޔަ ޑިފެންސް އެކްސްޕޯގައި ފެނުނު ޑްރޯން ޓެކްނޮލޮޖީ ފަދަ މޮޅު އުފެއްދުންތައް ރާއްޖޭގެ ކަނޑުތަކުގައި ބޭނުންކުރުމަށް ރާއްޖެއިން ޝައުޤުވެރިވާކަމަށެވެ.
މި ދަތުރުފުޅުގައި، މާރިޔާގެ އަރިހުގައި، އެމްއެންޑީއެފްގެ ބްރިގޭޑިއާ ޖެނެރަލް ވައިސް ވަހީދާއި، ކާނަލް އަބްދުލް މަތީން އަހްމަދާއި، ލެފްޓިނަންޓް ކާނަލް ހަސަން ޝާހިދުގެ އިތުރުން، އިންޑިއާ ސަރުކާރުގެ ދައުވަތަކަށް، ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ މެންބަރު، ހުސައިން ޝަހީމް ބައިވެރިވެވަޑައިގެންނެވިއެވެ.
