ހަތަރު މީހުނާއެކު ގދ ފިޔޯރީން ފުރައިގެން އައްޑޫ ސިޓީ ހިތަދޫއަށް ދަތުރުކުރި "މިހޯ ޕެލެސް" ނަމަކަށް ކިޔާ ލޯންޗެއް ފުރިފަހުން ހަބަރެއް ނުވެގެން ހޯދަމުންދަނިކޮށް ރޭ ފަތިހު ފެނިއްޖެއެވެ.
އެމްއެންޑީއެފުން ބުނީ އިއްޔެ ހަވީރު 16:30 ހާއިރު މި ލޯންޗު ގދ ފިޔޯރީން ފުރިފަހުން ހަބަރެއް ނުވެގެން އެމްއެންޑީއެފް ކޯސްޓްގާޑަށް ރިޕޯޓުކޮށްފައި ވަނީ ރޭ 22:33 ހާއިރު ކަމަށެވެ.
މި ހާދިސާގައި ހަބަރެއް ނުވެގެން ހޯދަމުންދިޔަ ލޯންޗު ފެނިފައިވަނީ ރޭ ފަތިހު 04:00 ހާއިރު އައްޑޫ ސިޓީ ހިތަދޫގެ އުތުރުން 15 މޭލު ބޭރުން ކަމަށްވެސް އެމްއެންޑީއެފުން ބުނެއެވެ.
އެ ލޯންޗު ރޭ ފަތިހު 05:30 ހާއިރު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންގެ އެހީތެރިކަމާއެކު ވަނީ އައްޑޫ ސިޓީ ހިތަދޫއަށް ގެންދެވިފައި ކަމަށާއި ލޯންޗުން ދަތުރުކުރި 4 މީހުންގެ ހާލުވެސް ރަނގަޅު ކަމަށް އެމްއެންޑީއެފުން މައުލޫމާތު ދެއެވެ.
ކަނޑުމަތީގެ ހާދިސާތަށް ގިނަވެފައިވާއިރު، ކަނޑުމަތީގައި ހިނގި 2 ހާދިސާއެއްގައި ދެ ދިވެއްސަކުވެސް ގެއްލިގެން އެމްއެންޑީއެފުން ދަނީ ހޯދަމުންނެވެ. ނަސްރުﷲ ނަމަކަށްކިޔާ އެ މީހާ ގެއްލިފައިވަނީ ޑިންގީއަކާއި ލޯންޗެއް ޖެހި ހިނގި ނުރައްކާތެރި އެކްސިޑެންޓެއްގައެވެ. ދެވަނަ މީހަކީ ފަރަށް އެރި ބޯޓަކުން ގެއްލުނު ދިވެހި ފިރިހެނެކެވެ.
