ގޮވާތަކެއްޗާއެކު ސިފައިންގެ ތަމްރީނެއް މާލެ ސަރަހައްދުގައި ހިންގުމަށް ތައްޔާރުވެފައިވާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ނެރުނު ނޫސްބަޔާނެއްގައި ބުނީ، ސިފައިންނަށް ކުރިއަށް ގެންދިއުމަށް ހަމަޖެހިފައިވާ ބޮމްބް އެންޑް އިމްޕްރޮވައިޒްޑް އެކްސްޕްލޯސިލް ޑިވައިސް ޑިސްޕޯސަލް ޓްރޭނިން އެޑްވާންސް ކޯސްގެ ފައިނަލް އެކްސަސައިޒް ބޭއްވުމަށް ނިންމާފައިވާ ކަމަށެވެ.
އެމްއެންޑީއެފުން ބުނީ މި ތަމްރީނު ކުރިއަށް ގެންދިއުމަށް ނިންމާފައި ވަނީ އަންނަ އާދިއްތަ ދުވަހުން ފެށިގެން ހޮނިހިރު ދުވަހުގެ ނިޔަލަށް ކަމަށެވެ. މި ތަމްރީނު ކުރިއަށް ގެންދިއުމަށް ހަމަޖެހިފައި ވަނީ މާލެ، ހުޅުލެ އަދި ހުޅުމާލޭގައެވެ.
މި ތަމްރީނުތައް ކުރިއަށް ގެންދިއުމުގައި ސިމިއުލޭޝަންގެ ގޮތުގައި ބޭނުންކުރާ ގޮވާތަކެތި ބޭނުން ކުރުމަށް ހަމަޖެހިފައިވާ ކަމަށް އެމްއެންޑީއެފުން ބުނެއެވެ.
ގޮވާތަކެއްޗާއެކު ސިފައިންގެ ތަމްރީނެއް ހިންގުމަށް ހަމަޖެހިފައި ވާއިރު، ސިފައިން ދަނީ ދޭތެރެ ދޭތެރެއިން މިފަދަ ތަމްރީނުތައް ހިންގަމުންނެވެ. އެމްއެންޑީއެފުން މިފަދަ ތަމްރީނުތައް ހިންގަމުން ދަނީ، ރާއްޖެއަށް ދިމާވެދާނެ ނުރައްކާތެރި ހާލަތަކަށް ސިފައިން ތައްޔާރަށް ތިބުމަށެވެ.
