ލ. ޖުޑިޝަލް ދާއިރާގެ އިސްމެޖިސްޓްރޭޓްގެ ސުލޫކީ މައްސަލައެއް ބަލަން ޖުޑިޝަލް ސާވިސް ކޮމިޝަނުން ނިންމައިފިއެވެ.
ޖޭއެސްސީން ބުނީ، ލ. ޖުޑިޝަލް ދާއިރާގެ އިސްމެޖިސްޓްރޭޓް އަލީ ޝަރީފާ ބެހޭގޮތުން އެ ކޮމިޝަނަށް ހުށަހަޅާފައިވާ މައްސަލައަކާ ގުޅޭ ލިޔެކިއުންތައް އެ ކޮމިޝަނުން ދިރާސާ ކޮށްފައިވާ ކަމަށެވެ.
ޖޭއެސްސީން ބުނީ އެ ލިޔެކިއުންތައް ދިރާސާ ކުރުމުގެ ތެރޭގައި، މައްސަލަ ސާބިތުވެއްޖެނަމަ، އަލީ ޝަރީފުގެ ސުލޫކަށް އަސަރުކުރާފަދަ ކަމެއް ފާހަގަ ކުރެވިފައިވާ ކަމަށެވެ. އަދި ޖޭއެސްސީގެ ގާނޫނުގެ ދަށުން އަލީ ޝަރީފުގެ ސުލޫކީ މައްސަލައެއް ބެލުމަށް ޖޭއެސްސީން ނިންމާފައިވާ ކަމަށް ޖޭއެސްސީން ބުނެއެވެ.
ލ. ޖުޑިޝަލް ދާއިރާގެ އިސްމެޖިސްޓްރޭޓްގެ ސުލޫކީ މައްސަލައެއް ބަލަން ޖޭއެސްސީން ނިންމާފައިވާއިރު، އެ ކޮމިޝަނުން ވަނީ މިދިޔަ އަންގާރަ ދުވަހު 4 ފަނޑިޔާރެއްގެ ސުލޫކީ މައްސަލަ ބެލުމަށް ނިންމާފައެވެ. އެ ފަނޑިޔާރުންގެ ތެރޭގައި، އދ. ދަނގެތި މެޖިސްޓްރޭޓް ކޯޓުގެ އިސް މެޖިސްޓްރޭޓް މުހައްމަދު އާމިރާއި، ގއ. ނިލަންދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަބްދުލްމުހްސިން އަބްދުލްހަކީމާއި ޅ. ނައިފަރު މެޖިސްޓްރެޓް ކޯޓުގެ ޅ. ޖުޑިޝަލް ދާއިރާގެ އިސްމެޖިސްޓްރޭޓް މުހައްމަދު މޫސާ އަދި ސިވިލް ކޯޓުގެ އިސް ގާޒީ އަބްދުﷲ އަލީ ހިމެނެއެވެ.
