މެދުރާއްޖެތެރޭގެ ރަށެއްގައި އާއިލާގެ މެންބަރެއްގެ ފަރާތުން ކުޑަކުއްޖަކަށް ޖިންސީ ގޯނާކުރާ މައްސަލައެއް ފެންމަތިވެއްޖެއެވެ.
މި މައްސަލަ ފެންމަތިވެފައި ވަނީ މިއަދު މަޖިލީހުގައި ޖިންސީ ގޯނާގެ ތުހުމަތަކާ ގުޅިގެން ޑިސްއެބިލިޓީ އެމްބެސެޑާ ކަމުން ދާދި ފަހުން ވަކިކުރި އަހުމަދު ހިޝާންގެ މައްސާލައިގައި ޖެންޑާ މިނިސްޓްރީން ވެފައިވާ އިހުމާލުތައް ބަލަން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ހުށަހެޅުއްވި ކުއްލި މައްސަލައިގެ ބަހުސްގެ ތެރެއިންނެވެ.
މަޖިލީހަށް ވެއްދި ކުއްލި މައްސަލައަށް ބަހުސް ކުރައްވަމުން މެންބަރު ނަސީރު ވަނީ އޭނާގެ ދާއިރާގެ ރަށެއްގައި ކުޑަކުއްޖަކަށް ޖިންސީ ގޯނާކުރާ މައްސަލައެއް ފާހަގަކުރައްވާފައެވެ. އެގޮތުން އެ ރަށުގައި ކިޔަވާ ސްކޫލްގައި އުޅޭ ކުޑަ އަންހެން ކުއްޖެއްގެ ބޮޑުބޭބެ (ބައްޕަގެ ކޮއްކޮ) އެ ކުއްޖާއަށް ޖިންސީ ގޯނާ ކުރަމުންދާ ކަމަށް އެ ސްކޫލްގައި ކިޔަވާ ބައެއް ކުދިންނަށް ކިޔައިދީފައިވާ ކަމަށެވެ.
މި މައްސަަލައިގައި ގުޅުން ހުރި މީހުން ގުޅިފައި ތިބީ ބާރުގަދަ ބަޔަކާ ކަމަށާއި އެ މީހުންނާ މެދު ފިޔަވަޅު އެޅިފައި ނުވާކަމަށް ނަސީރު ވިދާޅުވިއެވެ. އަދި ކުއްޖާގެ ބައްޕަގެ ކޮއްކޮއަކީ އެ ބައްޕަގެ ވިޔަފާރި ބަލަހައްޓާ ފަރާތްކަމަށް ވާތީ ބައްޕައަށް ކޮއްކޮ ދޫކޮށްލެވެން ނެތްކަމަށް ވެސް އޭނާ ވިދާޅުވިއެވެ.
މީގެ އިތުރުން ނަސީރު ވިދާޅުވީ، ވަރަށް އިހު ޒަމާނުން ފެށިގެން ރާއްޖޭގައި ކުޑަކުދިންނަށް ޖިންސީ ގޯނާ ކުރުމުގެ މައްސަލަތައް އެބަ އޮތް ކަމަށާއި މި ގޮތަށް ސިއްރުވެފައިވާ އެތައް މައްސަލައެއް މިހާރު ވެސް ހާމަނުވެ އޮންނާނެ ކަމަށެވެ. އަދި ކުޑަކުއްޖަކަށް އާއިލާ މެންބަރެއްގެ ފަރާތުން ޖިންސީ ގޯނާކުރާ މައްސަލައެއް އުޅޭ ކަމަށް އޭނާ ފާހަގަކުރި މައްސަލައަކީ ތުލުސްދޫގައި ހިނގާފައިވާ ކަމެއް ނޫންކަން ނަސީރު ފާހަގަކުރެއްވިއެވެ.
މި މައްސަލައަ ގުޅިގެން ރައީސް ނަޝީދު ވަނީ، އެ މައްސަލަތަކުގެ މައުލޫމާތު ހޯދަން އެ ރަށުގެ ކައުންސިލްގެ ރައީސް އާއި، ކޯޓުގެ މެޖިސްޓްރޭޓް، އަދި ސްކޫލްގެ ޕްރިންސިޕަލްއަށް ސިޓީއެއް ފޮނުވަން މަޖިލީހުގެ އަމީންއާންމު އަރިހުގައި ދަންނަވާފައެވެ.
