އައްޑޫ ސިޓީގެ އިސްމެހެލާ ހެރަގައި ހުންނަ ސައުތު ޕާމް ރިސޯޓުގައި މަސައްކަތް ކުރާ މުވައްޒަފެއް މަރުވެފައި އޮއްވާ ފެނިއްޖެއެވެ.
ސ. މީދޫ އާއި އެއް ފަޅެއްގައި އޮންނަ ސައުތު ޕާމް ރިސޯޓުގައި މުވައްޒަފެއް މަރުވެފައި އޮއްވާ ފެނުނުކަން "ދަ ޕްރެސް" އަށް ވަނީ ކަށަވަރުވެފައެވެ.
ފުލުހުން ބުނީ، އައްޑޫ ސީޓީގެ ސައުތް ޕާމް ރިސޯޓުގައި މަސައްކަތް ކުރާ މީހަކު ޑިއުޓީއަށް ނައިސްގެން ބެލިއިރު އޭނާގެ ކޮތަރީގައި ހަރަކާތެއް ނެތި އޮތުމުން އޭނާ ގޮވައިގެން ހުޅުމީދޫ ހެލްތް ސެންޓަރަށް ގެންގޮސްފައިވާ ކަމުގެ މައުލޫމާތު މިއަދު ހެނދުނު 9:19 ހާއިރު ފުލުހުންނަށް ލިބިފައިވާ ކަމަށެވެ.
އެ މީހާ ހުޅުމީދޫ ހެލްތް ސެންތަރަށް ގެނައި އިރު މަރުވެފައިވާ ކަމަށް ޑޮކްޓަރުން މައުލޫމާތު ދީފައިވެއެވެ. މަރުވެފައި ވަނީ އުމރުުން 48 އަހަރުގެ ދިވެހި ފިރިހެނެކެވެ. އަދި އޭނާގެ ހަށިގަނޑުގެ ބޭރު ފުށުން އެއްވެސް އަނިޔާއެއް ފެންނަން ނެތް ކަމަށް ފުލުހުން ބުނެއެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
