ޕާކިސްތާނުގެ ކުވެތާގައި ހުރި މިސްކިތެއްގައި ޖަމާއަތުގައި ނަމާދު ކުރަމުންދަނިކޮށް މީހަކު އަމިއްލައަށް މަރުވެގެން ދިން ހަމަލާއެއްގައި މަރުވި މީހުންގެ އަދަދު 15 އަށް އަރައިފިއެވެ.
ރޭގެ ވަގުތެއްގައި ހިނގާދިޔަ މި ހާދިސާގައި 19 މީހަކަށް އެކި ވަރުގެ ޒަހަމްތައް ލިބިފައިވާކަމަށް އޮފިޝަލުން ވިދާޅުވެއެވެ. މި މީހުން ތިބީ ކްރިޓިކަލް ހާލެއްގައި ކަމަށާ، އެހެންކަމުން މަރުވި މީހުންގެ އަދަދު އިތުރުވުން އެކަށީގެންވާކަމަށް ހޮސްޕިޓަލުގެ ކަމާބެހޭ ފަރާތްތަކުން ވަނީ ބުނެފައެވެ.
ހާދިސާގައި ހިނގި ވަގުތު މިސްކިތުގައި ހުރި ފިދާ މުޙައްމަދު ނަމަކަށް ކިއާ މީހަކާ ހަވާލާދީ، މީޑިއާއިން ރިޕޯޓްކޮށްފައިވާ ގޮތުގައި، އެ ވަގުތު މިސްކިތުގައި 60 އަކަށް މީހުން ތިއްބެވެ.
މައުލޫމާތު ލިބޭ ގޮތުގައި މިސްކިތުގައި ބާރުގަދަ ގޮވުމެއް ގޮއްވާލާފައިވަނީ ނަމާދަށް ފެށިތާ މަދު ސިކުންތު ކޮޅެއްގެ ތެރޭގައެވެ. އަދި އެގޮވުން ގޮވާދިޔައީ ޖަމާއަތުގެ ފުރަތަމަ ސަފުގެ ތެރެއިން ކަމަށްވެސް ޚަބަރު ލިބެއެވެ.
ގޮވީ ބާރުގަދަ ގޮވުމެއް ކަމަށާ، އެއާއެކު މިސްކިތުގައި ތިބި މީހުން އެކި ކޮޅުކޮޅަށް ދުވި ކަމަށާ، ގިނަ މީހުންނަށް އަނިޔާވީ ފިތިބާރުވުމުގެ ހާދިސާތައް ހިނގައިގެން ކަމަށް ފިދާ މުޙައްމަދު ވަނީ ކިޔައިދީފައެވެ.
ތޯލިބާނުން އާންމުކޮށް ބޭނުންކުރާ މިސްކިތަށް އަމާޒުކޮށް ދިން މި ހަމަލާގެ ޒިންމާ އައިސިސް ޖަމާއަތުން އުފުލާފައިވާކަމަށް ޚަބަރު ލިބެއެވެ. މި މިސްކިތަކީ ތޯލިބާނުންގެ ލީޑަރުވެސް ބޭނުން ކުރާ މިސްކިތެއް ކަމަށާ، ނަމަވެސް ހަމަލާ ދިން ވަގުތު އޭނާ މިސްކިތުގައި ނެތްކަމަށްވެސް މައުލޫމާތު ލިބެއެވެ. ތޯލިބާނުންނާ އައިސިސްއަކީ، ހަމަލާ ދިން ސަރަހައްދާ އިންވެގެން އޮންނަ އަފްގާނިސްތާނުގެ ކޮންޓްރޯލް ނެގުމަށް މަސައްކަތްކުރަމުންދާ ހަނގުރާމަވެރި 2 ޖަމާއަތެވެ.
ރޭގެ ހަމަލާގައި މަރުވި މީހުންގެ ތެރޭގައި މިސްކިތުގެ އިމާމާ، ފުލުސް އޮފިސަރެއްވެސް ހިމެނޭ ކަމަށް ޚަބަރު ލިބެއެވެ.
