ކ. ތުލުސްދޫ ކައިރީގައި އޮންނަ ކުޑަ ވިލިނގިލި ފަޅުގައި އަޅާފައި އޮތް ބޭރުގެ ސަފާރީ ޔޮޓެއްގައި އަލިފާނުގެ ހާދިސާއެއް ހިނގައި، އަޑިއަށް ހިނގައްޖެއެވެ.
އެމްއެންޑީއެފްއިން ބުނީ ތުލުސްދޫ ކައިރީގައި އޮންނަ ކުޑަ ވިލިނގިލި ނަމަކަށް ކިޔާ ފަޅެއްގައި އަޅާފައި އޮތް އޮސްޓްރޭލިއާ އަށް ނިސްބަތްވާ ސަފާރީއެއް ކަމަށްވާ "ވެރިތާ" ނަމަކަށް ކިޔާ ސަފާރީއެއްގައި ރޯވެފައިވާ ކަމުގެ މައުލޫމާތު ލިބިފައިވަނީ ފަތިހު 5:42 އެހާކަށްހާއިރު ކަމަށެވެ. ސަފާރީގެ އަލިފާން ކޮންޓްރޯލް ކުރުމަށް ފޯމް ބޭނުންކޮށްފައިވާ ކަމަށް އެމްއެންޑީއެފްއިން ބުނެއެވެ. އަދި އެ ސަފާރީގައި ރޯވެފައިވާ އަލިފާންގަނޑު ނިއްވާލުމުގެ މަސައްކަތް ކުރަމުގެ ތެރޭގައި ސަފާރީ އަޑިއަށް ގޮސްފައިވަނީ މިއަދު 9:32 ހާއިރުކަމަށް އެމްއެންޑީއެފްއިން ބުނެއެވެ.
އެމްއެންޑީއެފްއިން ބުނީ އަލިފާން ރޯވިއިރު އެ ސަފާރީގައި އޮސްޓްރޭލިއާއަށް ނިސްބަތްވާ ތިން ފިރިހެނުން ތިބި ކަމަށެވެ. އަދި އެ ތިން މީހުން އެތާ ކައިރީގައި އޮތް އެހެން ސަފާރީއަކަށް ނަގާފައިވާ ކަމަށާއި އަދި ފަރުވާ ދިނުމަށް ތުލުސްދޫ ސިއްހީ މަރުކަޒަށް ގެންގޮސްފައިވާ ކަމަށެވެ.
އެމްއެންޑީއެފްއިން ބުނީ ސަފާރީގައި ތިބި ތިން މީހުންނަށް މާ ސީރިއަސް އަނިޔާތަކެއް ލިބިފައިވާ ކަމުގެ މައުލޫމާތެއް ލިބިފައި ނުވާ ކަމަށެވެ.
