ސްޓޭޓް ބޭންކް އޮފް އިންޑިއާ (އެސްބީއައި) ކައިރިން ރަހީނުކޮށް، ފޭރިގަތް ކަމަށް ބުނެ ހުށަހެޅީ ދޮގު ރިޕޯޓެއް ކަމަށް ފުލުހުން ބުނެފިއެވެ.
މިކަމާ ގުޅިގެން ފުލުހުން ބުނީ، މިދިޔަ މަހު 26 ވަނަ ދުވަހު އަމިއްލަ ކުންފުންޏެއްގެ މުވައްޒަފަކު އެސްބީއައި އިން ދެ ކުންފުންޏެއްގެ ޗެކްތަކަކަށް ފައިސާ ނަގައިގެން ދަނިކޮށް ރަހީނުކޮށް ފައިސާތަކެއް ފޭރުނު ކަމަށް ބުނެ ފުލުހުުންނަށް މައްސަލައެއް ހުށަހަޅާފައިވާ ކަމަށެވެ. އަދި އެ މައްސަލަ ތަހުގީގުކޮށް ބެލިބެލުމުން، އެމީހާ ފުލުހުންނަށް ރިޕޯޓް ކޮށްފައިވަނީ ދޮގު ރިޕޯޓެއް ކަން އެނގިފައިވާ ކަމަށް ފުލުހުން ބުނެއެވެ.
ފުލުހުން ބުނީ މި މައްސަލް ރިޕޯޓް ކުރި މީހާ ފުލުހުންނަށް ދޮގު މައުލޫމާތު ދީފައިވާ ކަން ކަށަވަރު ކުރެވުނު ހިސާބުން އޭނާ ކޯޓު އަމުރެއްގެ ދަށުން ހައްޔަރުކޮށް، އޭނާ ދިރިއުޅޭތަން ބަލާ ފާސްކޮށް އެތަނުން 8000 ޑޮލަރު ހޯދާފައިވާ ކަމަށެވެ.
ފުލުހުން ބުނީ މި ޑޮލަރުތަކާއި ބެހޭގޮތުން ސުވާލު ކުރުމުން، އޭނާގެ އަތުން ބަޔަކު ނުފޭރޭ ކަމަށް އޭނާ އިއުތިރާފު ވެފައިވާ ކަމަށެވެ. އަދި އެ ފައިސާ ނަގައިގެން ގެންގޮސް ފޮރުވާ، ފައިސާ ޑޮލަރަށް މާރުކުރި ކަމަށާއި ބާކީ ފައިސާ ބޭނުން ކޮށްފައިވާ ކަމަށް ވެސް އޭނާ އިއުތިރާފް ވެފައިވާ ކަމަށް ފުލުހުން މައުލޫމާތުދެއެވެ.
މި މައްސަލާގައި ހިމެނޭ ފައިސާގެ އަދަދަކީ 127000 ރުފިޔާއެވެ. އަދި މި މައްސަލާގައި ހައްޔަރުކޮށްފައި ވަނީ އުމުރުން 31 އަހަރުގެ ބަންގްލަދޭޝް ފިރިހެނެއް ކަމަށް ފުލުހުން ބުނެއެވެ. ފުލުހުން ބުނީ، އޭނާ ހައްޔަރުކޮށްފައި ވަނީ މިދިޔަ މަހު 30 ވަނަ ދުވަހު ކަމަށެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
