ތޭރަ އަހަރުގެ ކުއްޖާ ވިހެއި މައްސަލައިގައި އެ ކުއްޖާގެ ބެލެނިވެރިންނަށް ދައުވާކޮށްފިއެވެ.
ޕީޖީ އޮފީހުން ބުނީ 13 އަހަރުގެ ކުއްޖަކު ވިހެއި މައްސަލައިގައި، އެކުއްޖާގެ ބެލެނިވެރި 2 މީހުންގެ ތެރެއިން އެކެއްގެ މައްޗަށް 4 ދައުވާ، އަނެކެއްގެ މައްޗަށް އެއް ދައުވާކޮށް، ކުރިމިނަލް ކޯޓަށް ހުށަހަޅައިފައި ވާ ކަމަށެވެ.
މި މައްސަލައިގައި އަންހެން މީހާގެ މައްޗަށް ދައުވާ ކުރަނީ ގާނޫނުލްއުގޫބާތުގެ 414 ވަނަ މާއްދާގެ (ހ) ގެ ދަށުން، 14 އަހަރަށް ވުރެ ދޮށީ މީހަކު ނެތި 24 ގަޑިއިރަށް ނުވަތަ އެއަށްވުރެ ގިނަ އިރަށް 1 އަހަރު ނުފުރޭ ކުޑަކުއްޖަކު ދޫކޮށްލުމުގެ ކުށުގެ ދައުވާއާއި، މި ޤާނުނުގެ 110 ވަނަ ބާބާއި 120 ވަނަ ބާބާއި 130 ވަނަ ބާބުގައި ބަޔާންކޮށްފައި ވާފަދަ ކުށްތަކުގެ ތެރެއިން ކުށެއް ކުރުމަކީ، އެކަށީގެންވާ ކަމެއްކަން އެނގިހުރެ އެފަދަ ކުށެއް ކުއްޖާއާމެދު ހިންގިޔަ ނުދިނުމަށް އަޅަންޖެހޭ އެކަށީންގެންވާ ފިޔަވަޅު އަޅާފައި ނުވުމުގެ ކުށުގެ ދައުވާއާއި، އެ ޤާނުނުގެ 521 ވަނަ މާއްދާގެ (ހ) ގެ ދަށުން ރަސްމީ އިދާރާތަކަށް ދޮގު މައުލޫމާތު ދިނުމުގެ ކުށުގެ ދަޢުވާއާއި، އެ ޤާނުނުގެ 533 ވަނަ މާއްދާގެ (ހ) ގެ ދަށުން ޤާނޫނު ހިންގުމަށް ހުރަސް އެޅުމާއި ދައުލަތުގެ އެހެނިހެން މަސައްކަތްތައް ހުރަސްއެޅުމުގެ ކުށުގައެވެ،
އަދި މި މައްސަލާގައި ފިރިހެން މީހާގެ މައްޗަށް ދައުވާ ކުރަނީ ގާނޫނުލްއުގޫބާތުގެ 533 ވަނަ މާއްދާގެ (ހ) ގެ ދަށުން ގާނޫނު ހިންގުމަށް ހުރަސް އެޅުމާއި ދައުލަތުގެ އެހެނިހެން މަސައްކަތްތައް ހުރަސްއެޅުމުގެ ކުށުގެ ދައުވާއެވެ.
13 އަހަރުގެ އަންހެން ކުއްޖަކު ވިހެއި މައްސަލައިގައި ބަންދު ކޮށްފައިވާ ދެމީހުން މިހާރުވެސް ތިބީ ބަންދުގައެވެ. އަދި މި ދެމީހުނަށް ދައުވާ ކުރުމަށް ޕީޖީން ފޮނުވި އިރެއް ބުނެފައެއް ނުވެއެވެ.
