ބާތިލް ފިކުރުތައް ފަތުރާ ޝެއިހުންގެ އަވައިގައި ދިވެހިން ޖެހެމުންދާ ކަމަށް ދީނީ އިލްމުވެރިޔާ އަލީ ޒައިދު ވިދާޅުވެއްޖެއެވެ.
ޒައިދު ކުރެއްވި ޓްވީޓެއްގައި ވިދާޅުވީ ޓްވިޓާ އާއި އެފްބީގައި ޝެއިހް ޖަހައިގެން އުޅޭ އެކި އެކި ބާތިލް ފިކުރުތައް ފަތުރާ މީހުންގެ އަވައިގައި ބައެއް ދިވެހިން ޖެހެމުން ދާކަން ފާހަގަ ކުރެއްވޭ ކަމަށެވެ.
އަބޫބަކުރުގެފާނާއި އުމަރުގެފާނަށް ލައުނަތް ލެއްވުމަށް ގޮވާލައި ބައެއް ޝީއީންގެ ކިބައިންވެސް ދިވެހިން ފަތުވާ ނަގަމުންދާ ކަމަށް ޒައިދު ވިދާޅުވިއެވެ.
ޒައިދު މިގޮތަށް ވިދާޅުވެފައި މި ވަނީ ހަރުކަށި ފިކުރުގެ އަޑު ރާއްޖޭގައި ގަދަވެފައިވާ ދުވަސްވަރެއްގައެވެ.
ދިފާއީ ބާރުތަކުން އަންނަނީ ހަރުކަށި ފިކުރުތަކާ ދެކޮޅަށް ބޮޑެތި އޮޕަރޭޝަންތަކެއް ހިންގަމުންނެވެ. އެގޮތުން ވަރަށް ފަހުން ވަނީ ރ. މަޑުއްވަރީގައި އޮޕަރޭޝަނެއް ހިންގައި ބަޔަކު ހައްޔަރު ކޮށްފައެވެ.
ދިފާއީ ބާރުތަކުން ވަނީ ހަރުކަށި ފިކުރު ފަތުރާ ފަރާތްތަކުގެ މައުލޫމާތު ހާމަ ކުރުމަށްވެސް ރައްޔިތުންގެ ކިބައިން އެދިފައެވެ.
