މި ހިނގާ ޑިސެމްބަރުމަހުގެ 4 ވަނަ ދުވަހުގެ ރޭ ހުޅުމާލޭގައި މަރާލި ޓެކްސީ ޑްރައިވަރު ގާސިމް ހަސަން، 59 ގެ ގާތިލުގެ ވަނަވަރު އާންމު ވެއްޖެއެވެ. ގާސިމް މަރާލި ކަމަށް އިއުތިރާފުވެފައިވަނީ ޅ. ހިންވަރު، ބޮޑުހިޔާގެ، އުމުރުން 21 އަހަރުގެ އަދުހަމް މުހައްމަދެވެ.
ގާތިލުގެ ވަނަވަރު އާންމުވެފައި ވަނީ އޭނާގެ ބަންދު އަމުރުގެ ކޮޕީ ލީކުވުމުންނެވެ. ކްރިމިނަލް ކޯޓުގެ ބަންދުއަމުރު ކޮޕީގައި ވާގޮތުން އޭނާ ވަޅިން ހަމަލާދިން ގޮތާއި، އެކަމަށް އިއުތިރާފުވެފައި ވާކަން އެނގެން އޮވެއެވެ. އަދި އޭނާ ގާސިމް ހަސަން މަރާލިކަމަށް އިއުތިރާފުވެފައި ވާކަމަށްވެސް އެ އަމުރުގައި އޮވެއެވެ.
ޓެކްސީ ޑްރައިވަރު ގާސިމް ހަސަންގެ ކަރަށް ވަޅިހަރާ މަރާލައިފައި އޮއްވާ ފެނުނީ، ހުޅުމާލެ ސެންޓްރަލް ޕާކް އުތުރުން އޮންނަ ރީތިގަސް މަގުންނެވެ. އެއީ، ގަސް ގިނަ އަދި ރޭގަނޑު ވަރަށް އަނދިރިކޮށް އޮންނަ މަގެކެވެ.
ގާސިމްގެ ގާތިލަށް ކޯޓުން ދީފައިވަނީ 15 ދުވަހުގެ ބަންދުގެ މުއްދަތެކެވެ. 15 ދުވަސް ވާއިރު ފުލުހުން ދައުވާ ކުރުމަށް ނުފޮނުވާ ނަމަ، އަނެއްކާވެސް ބަންދުގެ މުއްދަތު އިތުރު ކުރަން ކޯޓަށް ގެންދާނެއެވެ. އަދި އެ މުއަދަތު އިތުރު ކުރުމާ ނުކުރުން އޮންނަނީ މައްސަލަ ބައްލަވާ ގާޒީއެއްގެ އިހުތިޔާރުގައެވެ.
ގާސިމުގެ ގާތިލުގެ ކަސްޓޯޑިއަލް ޖަލެއްގައި ބަންދުކޮށްފައި ބެހެއްޓުމަށް މިމަހުގެ ވިހިވަނަ ދުވަހު އަމުރު ނެރެދެއްވީ ގާޒީ އަލީ ރަޝީދު ހުސައިންއެވެ.
ގާސިމުގެ ގާތިލުގެ ބަންދުގެ މުއްދަތު ހަމަވާ ތާރީހަކީ ޖެނުއަރީ 4، 2020 އެވެ.
