ކުށްވެރިން ހޯދަން އެންމެންގެ ޑީއެންއޭ ރައްކާކޮށް، ބެލެހެއްޓޭނެ ޑޭޓާ ބޭހެއް ހެދުމަކީ މުހިންމު ކަމެއް ކަން ފާހަގަކޮށް އެކަން ކުރުމަށް ދަނގެތި ދާއިރާގެ މެންބަރު އަދި ކުރީގެ ޑިފެންސް މިނިސްޓަރު މުހައްމަދު ނާޒިމް ގޮވާލައްވައިފިއެވެ.
ރައްޔިތުންގެ މުދަލާއި ފުރާނަ ރައްކާތެރިކޮށް، އަމަންކަން ގާއިމް ކުރުމަށް ހުރިހާ ދިވެހި ރައްޔިތުންގެ ޑީއެންއޭ ހިމެނޭ ޑޭޓާ ބޭހެއް އެކުލަވާލުމަށް ނާޒިމް ގޮވާލެއްވީ މިމަހު 4 ވަނަ ދުވަހުގެ ރޭ ތޫނު އެއްޗަކުން ހަމަލާދީ އަނިޔާވެރިކޮށް މަރާލި ޓެކްސީ ޑްރައިވަރު ގާސިމް ހަސަންގެ މަރާއި ގުޅިގެން މީހަކު ހައްޔަރުކޮށްފައި ނުވާތީއެވެ.
އދ. މާމިގިލީ، ގާސިމް ހަސަން، 59، މަރާލާފައި އޮއްވާ ފެނުނު ސަރަހައްދުން ފިންގާޕްރިންޓާއި ޑީއެންއޭ ފަދަ ފޮރެންސިކް ހެކި ހޯދައިފައިވީ ނަމަވެސް އަދި ޑީއެންއޭ އެއްވެސް ފަރާތަކާ ދިމާވެފައި ނުވާ ކަމަށް ފުލުހުން ވަނީ ބުނެފައެވެ. ނާޒިމް ވަނީ މިކަމާ ގުޅިގެން ކަންބޮޑުވުން ފާޅުކުރައްވާފައެވެ.
ގާސިމްގެ މަރުގެ މައްސަލައިގެ ތަހުގީގު ކުރިއަށްދާ މިންވަރު ހާމަ ކުރައްވަމުން ޕޮލިސް ކޮމިޝަނަރު މުހައްމަދު ހަމީދު މީގެ ކުރިން ވިދާޅުވެފައިވާ ގޮތުގައި، ގާސިމް މަރާލުމަށް ބޭނުން ކުރި ހަތިޔާރުވެސް އޭނާ މަރާލާފައި އޮއްވާ ފެނުނު ތަނުގެ 300 އެއްހާ މީޓަރު ދުރުން މަގު ކައިރީ ހުރި ގަސްތަކުގެ ތެރެއިން ފެނިފައިވާ ކަމަށެވެ. އަދި ހުޅުމާލޭގައި ހުރި ސީސީޓީވީ ފޫޓޭޖުތަކުން ގާސިމް ދުއްވި ޓެކްސީ ދަތުރު ކޮށްފައިވާ މަގުތައް ދެނެގަނެވިފައިވާ ކަމަށާއި ގާސިމްގެ ގާތިލުން ދެނެގަތުމަށް ލިބުނު މި ކުރިއެރުމާ އެކު ފުލުހުންގެ ޓީމެއް މިކަމުގައި ހަރަކާތްތެރި ވަމުންދާ ކަމަށް ވެސް ސީޕީ ވަނީ ވިދާޅުވެފައެވެ.
މި މައްސަލަ ތަހުގީގު ކުރުމުގައި ހަރަކާތްތެރި ވަމުން ދަނީ ފުލުހުންގެ ސީރިއަސް ކްރައިމް ޑިޕާޓްމަންޓުންނެވެ.
ގާސިމްގެ ކަރަށް ވަޅި ހަރައި މަރާލާފައި އޮއްވާ ފެނުނީ ހުޅުމާލެ ސެންޓްރަލް ޕާކް އުތުރުން އޮންނަ ރީތިގަސް މަގުންނެވެ. އެއީ، ގަސް ގިނަ އަދި ރޭގަނޑު ވަރަށް އަނދިރިކޮށް އޮންނަ މަގެކެވެ. ގާސިމަށް ހަމަލާ ދީފައިވަނީ ގްރޫޕަކުން ކަމަށް ބުނާއިރު، ހަމަލާ ދީފައި ހުރީ ސީދާ އޭނާގެ ކަރަށް ކަމަށް މަންޒަރު ދުށް ބައެއް މީހުން ބުނެފައި ވެއެވެ. ޒަހަމްތަކަކާއެކު ގާސިމް ހޮސްޕިޓަލަށް ގެންދިޔަ އިރުވެސް އޭނާ ވަނީ މަރުވެފައި ކަމަށް ހޮސްޕިޓަލުން މައުލޫމާތު ދީފައި ވެއެވެ.
