އިއްޒުއްދީން ސްކޫލުން ޖާގަ ލިބިފައިވާ ދަރިވަރުން ރަޖިސްޓްރީ ކުރަން ފަށައިފިއެވެ.
މިނިސްޓްރީ އޮފް އެޑިއުކޭޝަނުން ބުނީ، 2020 ވަނަ އަހަރަށް އިއްޒުއްދީން ސްކޫލުން ޖާގަ ލިބިފައިވާ ދަރިވަރުން ރަޖިސްޓްރީ ކުރުމުގެ ފުރުސަތު މިއަދުން ފެށިގެން ހުޅުވާލާފައިވާ ކަމަށެވެ. އެގޮތުން، ރަޖިސްޓްރީ ކުރުން ކުރިއަށް ދާނީ މިއަދުން ފެށިގެން ކޮންމެ ރަސްމީ ދުވަހެއްގެ ހެނދުނު 8:30 އިން ފެށިގެން މެދުނުފަހު 1:00 އާ ހަމައަށް އެ މިނިސްޓްރީން ބުނެއެވެ.
އެޑިއުކޭޝަން މިނިސްޓްރީން ބުނީ، ދަރިވަރުންގެ ރަޖިސްޓްރޭޝަން ފޯމު އެ މިނިސްޓްރީގެ ވެބްސައިޓުންނާއި، ވެލާނާ ބިލްޑިންގެ 8 ވަނަ ފަންގިފިލާގައި ހުންނަ އެ މިނިސްޓްރީގެ ރިސެޕްޝަނުން ލިބޭނެ ކަމަށެވެ.
"އިއްޒުއްދީން ސްކޫލު"ގެ ނަމުގައި މާލޭގައި އާ ސްކޫލެއް ހުޅުވަން އެޑިއުކޭޝަން މިނިސްޓްރީން ނިންމާފައިވަނީ، މާލޭގެ ސްކޫލުތަކަށް ދިމާވެފައިވާ ޖާގައިގެ ދަތިކަން ހައްލުކުރުމުގެ ގޮތުންނެވެ.
މި ސްކޫލް ހިންގުމަށް މާލެ އިންގްލިޝް ސްކޫލް (އެމްއީއެސް) ހިންގި އިމާރާތް ހަމަޖައްސާފައި ވާއިރު، މިއީ ގްރޭޑް 1 އިން 10 އާ ހަމައަށް ކިޔަވައިދޭ އެއްދަންފަޅި އަށް ކިޔަވައިދޭ ސްކޫލެކެވެ. ނަމަވެސް، 2020 ވަނަ އަހަރު މި ސްކޫލުން ކިޔަވައިދޭނީ ގްރޭޑް އެކަކުން ގްރޭޑް ހައަކަށެވެ. ގްރޭޑް ހަތަކުން ގްރޭޑް 10 އަށް ގްރޭޑްތައް ތައާރަފްކުރާނީ 2021 ވަނަ އަހަރުން ފެށިގެން ކޮންމެ އަހަރަކުވެސް އެއް ގްރޭޑް އިތުރުކޮށްގެންނެވެ.
