ބައިނަލްއަގްވާމީ ފެންވަރުގައި ކޮންމެ އަހަރެއްގެ ޑިސެންބަރު މަހުގެ 10 ވަނަ ދުވަހު ފާހަގަކުރަމުން މިދާ އިންސާނީ ހައްގުތަކުގެ ދުވަހުގެ މުނާސަބަތުގައި ބޭއްވި ހަފްލާގައި ވާހަކަފުޅު ދައްވަމުން އަންހެނުންނާއި ކުޑަކުދިންގެ ހައްގުތަކުގެ ދިފާއުގައި ރައީސް އިބްރާހިމް މުހައްމަދު ސޯލިހް ތެދުވެއްޖެއެވެ.
މިއަދު ހެނދުނު ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ސޯލޮިހް ވިދާޅުވީ، އިންސާނީ ހައްގުތަކުގެ ވާހަކަ ދައްކާއިރު، މިންތީގެ ހަމަހަމަކަމުގެ ވާހަކަ ހަރުއަޑުން ދައްކަންޖެހޭ ކަމަށެވެ. އަދި އަންހެނުންގެ ހައްގުތައް ހިމާޔަތްކޮށް، މުޖުތަމައުގައި އަންހެނުން ބާރުވެރިކޮށް، ހައްގު މަގާމު ހޯދައިދިނުމަކީ، މި ސަރުކާރުން ވަރަށް ބޮޑަށް އިސްކަންދޭ ކަމެއް ކަމަށާއި ސަރުކާރުގެ ސިޔާސަތު ބިނާކޮށްފައިވާނީ އެކަމަށް އިސްކަންދީގެން ކަމަށް އެމަނިކުފާނު ވިދާޅުވިއެވެ.
މިންތީގެ ހަމަހަމަކަމުގެ ވާހަކަ ދައްކަވަމުން ރައީސް ސޯލިހް ވިދާޅުވީ، ސުޕްރީމް ކޯޓަށް ފުރަތަމަ ފަހަރަށް އަންހެން ފަނޑިޔާރުން އައްޔަނުކުރީ މި ސަރުކާރުން ކަމަށާއި، މި ސަރުކާރުން ވަނީ ލޯކަލް ކައުންސިލްތަކުގެ ތިންބައިކުޅަ އެއްބައި އިންސައްތަ، އަންހެނުންނަށް ހާއްސަ ކޮށްފައި ކަމަށެވެ. އަދި މި ސަރުކާރުގެ ކެބިނެޓް މިނިސްޓަރުންގެ 35 އިންސައްތައަކީ، އަންހެން ބޭފުޅުން ކަމަށާއި، މިކަމުން ދައުލަތުގެ މަތީ މަގާމުތަކުގައި އަންހެނުންގެ ދައުރު ފުޅާކޮށް، ސިޔާސީ މައިދާނުގައި އަންހެނުންގެ ބައިވެރިވުން އިތުރުކުރުމަށް މި ސަރުކާރުން ދޭ ސަމާލުކަން ހާމަވެގެންދާ ކަމަށް އެމަނިކުފަނު ވިދާޅުވިއެވެ.
އަންހެނުންގެ ހައްގުގައި މި ސަރުކާރުން ކޮށްފައިވާ ކަންކަން ފާހަގަ ކުރައްވަމުން ރައީސް ސޯލިހް ވަނީ، ވިހައިގެން އުޅޭ މައިންނަށް، ލިބޭ ޗުއްޓީ 6 މަހަށް އިތުރު ކޮށްދީފައިވާ ކަމަށާއި މި ބަދަލުގެ ސަބަބުން، ޅަދަރިމައިން އުފުލަންޖެހޭ ތަކުލީފުތަކަށް ވަރަށް ބޮޑު ލުޔެއް ލިބިފައިވާ ކަން ފާހަގަކުރައްވާފައެވެ. އަދި މިކަމުގެ ސަބަބުން އާއިލާއެއް ބިނާވާން ފެށުމުން، ވަޒީފާއާއިގެން ކުރިއަށް ދާނީތޯ، ނުވަތަ ދަރިފުޅު ބަލަން ގޭގައި އިންނާނީތޯ، މިކަމާމެދު ކުރަންޖެހޭ ފިކުރުތައް، ކޮންމެވެސް ވަރަކަށް އަންހެނުންނާއި އާއިލާތަކަށް ދުރުކޮށްދެވިފައިވާ ކަމަށް އެމަނިކުފާނު ވިދާޅުވިއެވެ.
ރަސްމިއްޔާތުގައި ވާހަކަ ދައްކަވަމުން ރައީސް ސޯލިހް ވިދާޅުވީ، އިންސާނާގެ ހައްގުތައް ފެށޭ އިމަކީ، މައިމީހާގެ ބަނޑުގައި ދަރިފުޅު ގަރުބަގަންނަ ވަގުތު ކަމަށެވެ. އަދި އެ ދަރިފުޅު އުފަންވުމާއެކު، އާންމު އިންސާނުންނާ ހިލާފަށް، ކުޑަކުއްޖެއްގެ ހައިސިއްޔަތުން، އެދަރިފުޅަށް ލިބެންޖެހޭ އެތައް ބައިވަރު ހައްގުތަކަކާއި އިނާޔަތްތަކެއް ހުންނަކަމަށާއި، އޭގެ ތެރެއިން އެންމެ މުހިންމު ހައްގަކީ، ހަށިހެޔޮ ދުޅަހެޔޮ ސިއްހަތެއްގައި ހެދި ބޮޑުވުމުގެ ހައްގު ކަން އެމަނިކުފާނު ފާހަގަ ކުރެއްވިއެވެ.
ރައީސް ސޯލިހް ވިދާޅުވީ، ޅަފަތުގަޔާއި އެކި އުމުރުފުރާތަކުގައި ޖަހަންޖެހޭ ވެކްސިންތައް ކުދިންނަށް ދިނުމަކީ، ހެދި ބޮޑުވުމުގެ ހައްގު ކަށަވަރުކޮށްދިނުމުގެ އެންމެ މުހިންމު ބަހާ ކަމަށެވެ. އެމަނިކުފާނު ވިދާޅުވީ އުމުރާ ގުޅޭގޮތުން، ސިއްހަތަށް ފައިދާހުރި ކާނާ ދިނުމަކީވެސް ކުޑަކުދިންގެ ހައްގުތަކާ ގުޅިފައިވާ ކަމެއް ކަމަށާއި، މި ސަރުކާރުން ފެށި ނާސްތާ ޕްރޮގްރާމަކީ ވެސް، މި ހައްގުގެ ހިމާޔަތުގައި އެޅުނު މުހިންމު ފިޔަވަޅެއް ކަމަށެވެ.
މީގެ އިތުރުން އެމަނިކުފަނު ވިދާޅުވީ، ކުޑަކުދިންގެ ހައްގުތަކަށް އަރައިގަތުމުގެ އެއްވެސް އަމަލަކަށް ޖާގަ ދީގެން ނުތިބެވޭނެ ކަމަށެވެ. އަދި ދީނުގެ ނަމުގައި ފަތުރާ ހަރުކަށި ފިކުރުގެ ތެރެއިންވިޔަސް، ކުޑަކުދިންގެ ހައްގުތަކަށް އަރައިގަތުމަކީ، މި ސަރުކާރުން ތަހައްމަލު ކުރާނެ ކަންކަމެއް ނޫން ކަމަށާއި ގާނޫނީ ގޮތުންވެސް ކުޑަކުދިންގެ ހައްގުތައް ހިމާޔަތްކުރުމަށް މަސައްކަތް ކުރަމުންދާ ކަމަށެވެ.
