މައްޗަންގޯޅި ގެއެއްގެ ޓެރަސްމަތީގައި މަރުވެފައި އޮތް މީހަކު ފެނިއްޖެއެވެ.
ފުލުހުންގެ މީޑިއާ އޮފިޝަލް މައުލޫމަތުދޭ ގޮތުގައި މިއަދު ހެނދުނު 11:18 ހާއިރު މައްޗަން ގޯޅި ގެއެއްގެ ޓެރެސް މަތީގައި ފިރިހެނަކު ވެއްޓިވައި އޮތް ކަމުގެ މައުލޫމާތު ފުލުހުންނަށް ލިބިފަިއވާ ކަމަށެވެ. މައުލޫމާތު ލިބުމާއި ގުޅިގެން ފުލުހުން އެ ގެއަށް ގޮސް ބެލިއިރު، އެ ފިރިހެން މީހާ އަގައިން ފޮނު އަރާފައިވާކަމަށް ފުލުހުން ބުނެއެވެ. މި މީހާ ދެނެގަތުމުގެ މަސައްކަތް ފުލުހުން ކުރަމުންދާ ކަމަށާއި، އެމްއެންޑީއެފްގެ އެހީތެރިކަމާއެކު އެ މީހާ ތިރިއަށް ބާލައި، ހޮސްޕިޓަލަށް ގެންދިއުމުގެ މަސައްކަތް ކުރަމުންދާ ކަމަށް ފުލުހުން ބުނެއެވެ.
ފުލުހުން ބުނީ އެމީހާއަކީ އެގޭގައި ދިރިއުޅޭ މީހެއް ނޫންކަމަށް މިހާތަނަށް ފުލުހުން ބެލި ބެލުމުން އެނގިފައިވާ ކަމަށެވެ. މި މައްސަލާގައި ފުލުހުން ބަލަންޖެހޭ ކަންކަން ބަލަމުން ގެންދާ ކަމަށް ފުލުހުން ބުނެއެވެ.
ފަހަކަށް އައިސް މިފަދަ ހާދިސާތައް ފެންނަމުން ދާ ކަން ފާހަގަކޮށްލެވެއެވެ. އެގޮތުން މިދިޔަ ހޯމަ ދުވަހު މާފްނަނުގައި ހުންނަ ގެއެއްގެ ތެރެއިން އުމުރުން ދުވަސްވީ މީހަކުވަނީ މަރުވެފައި އޮއްވާ ފެނިފައެވެ. މަރުވެފައި އޮއްވާ ފެނުނީ އުމުރުން 60 އަހަރުގެ ދިވެހި ފިރިހެނެކެވެ. މީގެ އިތުރުން މައްޗަންގޯޅި ގެއަކުންވެސް ދިވެހި އަންހެނަކު މަރުވެފައި އޮއްވާ ވަނީ ފެނިފައެވެ.
